Русија бара од Украина да престане со воената акција, да го промени нејзиниот устав за да внесе неутралност, да го признае Крим како руска територија и да ја признае независноста на сепаратистичките републики Доњецк и Луганск, изјави портпаролот на Кремљ, Дмитриј Песков.
Песков за западни медиуми изјави дека Москва му порачала на Киев дека веднаш ќе ја прекине војната доколку се исполнат условите. Тоа е најјасната изјава на Русија досега за тоа што сака да и наметне на Украина за да ја запре инвазијата, која Кремљ ја нарекува „специјална воена операција“.
Песков вели дека Украина знае за овие услови и „дека им било кажано дека тоа може да се прекине во моментот“.
Што се однесува до неутралноста, Песков рече дека Русија бара уставни амандмани со кои „Украина ќе ги отфрли целите за приклучување кон кој било блок“.
– Ова може да се направи само со промена на уставот – рече тој.
Портпаролот на Кремљ вели дека Русија не е заинтересирана за дополнителна украинска територија.
– Навистина ставаме крај на демилитаризацијата на Украина. Ќе ја завршиме. Но, главната работа е Украина да ја прекине својата воена акција. Треба да ја прекинеме нашата воена акција и тогаш никој нема да пука – рече тој.
„Разговаравме и за тоа како треба да признаеме дека Крим е руска територија и дека тие мора да признаат дека Доњецк и Луганск се независни држави. И тоа е тоа. Ќе престане за момент“, изјави Песков за западни медиуми.
Песков ги претстави барањата на Кремљ пред третиот круг од украинско-руските преговори во Белорусија.
Официјална Москва тврди дека евакуацијата на цивилите од украинските градови е во застој поради што Киев не ги исполнува условите за воспоставување хуманитарни коридори.
Руското Министерство за одбрана тврди дека украинските „националисти“ го задржуваат населението под закана и продолжуваат да ги гранатираат руските позиции и покрај прекинот на огнот.
И портпаролот на проруските сили во регионот на Доњецк, Едуард Басурин за руската државна телевизија изјави дека автобус со бегалци од Мариупол ја преминал руската граница.
Шефот за операции на Меѓународниот комитет на Црвениот крст (МКЦК), Доминик Стилхарт предупреди на опасноста од мините. Тој додаде дека од персоналот на Црвен крст се обиделе да го напуштат Мариупол на договорена рута во неделата, но откриле дека патот што им беше препорачан е миниран.
