Владимир Лукаш е музичар, визуелен уметник, поет, прозаист…Активно работи во сите сфери на уметноста, а светот без луѓе како него би бил многу сиромашно место за живеење.
Не се сакате себеси кога…
– Секогаш се сакам себеси, но оддалеку.
Човекот без страст би бил…
– Мермерен бирократ.
Кога после смртта би се реинкарнирале, би сакале да се родите како…
– Света крава во пролетна ливада.
Животот без секојдневни ритуали би бил…
– Како комарец што се плаши од крв.
Да можете да ја искомпонирате музиката што ќе отсликува вашиот живот би звучела како…?
– Дедлајнерски блуз.
Да не се сомневаш во себе значи…
– Да си тој од другата страна на огледалото.
Луѓето со лоша смисла за хумор се…
– Секој хумор е добар, без разлика дали е смешен или не.
Идеално општество е она во кое…
– Идеите би виселе на дрвјата како највкусни овошки – достапни за сите, за разлика од сега – кога на дрвјата висат идеалистите-правдоборци.
Не сме слободни сѐ додека…
– Се плашиме да се спротиставиме на себеси.
Кога секој ден би морале да јадеме сладолед, вашиот би бил со вкус на…
– Кога би морале, сладоледот би бил невкусен.
