Полициската управа на Њујорк започна со тестирање нови беспилотни летала дизајнирани да пренесуваат звучни пораки до јавноста, како што се предупредувања за опасни временски услови или итни случаи во близина.
Неодамна, њујоршкиот систем за известување за итни случаи преку Твитер соопшти дека полицијата ќе спроведе тест за способност за размена на јавни пораки на далечина, по неколкунеделните обилни дождови и ретките предупредувања за поплави што го зафатија градот.
Портпаролот на полицијата подоцна истиот ден потврди дека тестовите биле спроведени во паркот „Хук Крик“ во Квинс пред новите врнежи што се очекуваат, но не откри детали за резултатите од тестот.
На пример, беспилотните летала можат да пренесуваат пораки низ населбите загрозени од поплави или слични екстремни временски настани, предупредувајќи ги жителите да останат дома и да бараат засолниште.
Одлуката да се избегне терминот „дронови“ и да се замени со терминот „аудиопредаватели“ може да биде намерна, бидејќи тестот всушност може да претставува прекршување на законите за јавен надзор. Овој закон налага полицијата да бара коментари од јавноста и да објави известување за употреба 90 дена пред да ја користи новата технологија за надзор. Меѓутоа, правилата не ја покриваат целата технологија во полицискиот арсенал поради „дупката во законот“ што потенцијално ѝ овозможува на полицијата веднаш да воведе нови алатки означувајќи ги како „подобрување“ на широките категории во рамките на нејзините постојни технолошки политики како што се „беспилотните летала“. Дупка во законот ѝ дозволи на полициската управа во Њујорк да користи роботско куче наречено Дигидог без претходна најава од 90 дена.
Беспилотните летала опремени со звучници беа користени во Шангај, Кина, и во Мадрид, Шпанија, за време на пандемијата на коронавирусот. Тие пренесоа предупредувачки пораки до населението строго да ги следи мерките за изолација. Во Шангај беспилотните летала ги предупредуваа жителите да не пеат од нивните прозорци, а градот испрати свое куче-робот да патролира низ населбите.
