Во светот има пет различни вкуса, но тим од американски научници верува дека на таа листа треба да се додаде нов, шести вкус
Науката го препознава постоењето на пет основни човечки вкуса: слатко, кисело, солено, горчливо и вкусно (умами). Неодамнешното истражување сугерира дека на таа листа треба да се додаде нов вкус, поврзан со амониум хлорид, откриен од тим научници од Универзитетот во Јужна Калифорнија и Универзитетот во Колорадо во САД.
Амониум хлоридот, кога ќе дојде во контакт со човековото сетило за вкус, предизвикува уникатна сензација, опишана како мешавина од горчина, соленост и навестување на киселост. Додека реакциите на животните на соединението се опширно проучувани, точниот одговор на човечките сетила за вкус остана предмет на ограничена научна анализа.
Широка примена
Амониум хлоридот се користи во лекови и ѓубрива, а се користи и за подобрување на крцкавоста на грицките во некои азиски региони. Во Европа се користи како сол за ароматизирање темни слатки.
– Ако живеете во скандинавска земја, ќе бидете запознаени со вкусот и можеби ќе ви се допадне – забележува неврологот Емили Лиман од УСЦ.
Клучен протеин
Новата студија, која беше објавена во списанието „Нејчр комјуникејшнс“, ги проширува резултатите од претходните истражувања за протеинот отоптерин1 (OTOP1), кој ја разјасни неговата улога во откривањето на киселиот вкус и неговиот ефект врз нивото на клеточната киселина. Една нова студија откри како ОТОП1 реагира на амониум хлоридот.
Кога култивираните човечки клетки беа одделно изложени на кисел вкус и амониум хлорид, рецепторот ОТОП1 покажа слични одговори на двата стимула.
Во истражувањата на животни, глувците без генот ОТОП1 покажале рамнодушност кон храната што содржи амониум хлорид, додека оние со генот активно ја избегнувале.
Се чека конечна потврда
Оваа претходно неоткриена патека за активирање навестува потенцијално вклучување на шести вкус во листата, иако е неопходно дополнително истражување за дефинитивна потврда и официјално признавање.
Во идните истражувања научниците сакаат подлабоко да го проучат одговорот на рецепторот ОТОП1 на амониум хлоридот и да ги проценат потенцијалните варијации во овој одговор кај различните видови. Важно е да се напомене дека различни животни различно реагираат на амониум хлоридот.
Дури и обичниот црв, каенорабдитис елеганс, може да го препознае овој вкус и да избегне одредена потенцијална храна поради него.
Веројатно е дека природната еволуција нè условила да се држиме подалеку од супстанции што го стимулираат овој вкус поради нивната потенцијална токсичност, иако луѓето се приспособиле да ги консумираат во ограничени количества.
– Амониумот е донекаде токсичен, па логично е што еволуиравме механизми за вкус за да го откриеме – објаснува Лиман.
