Нема ништо полошо од несоница – по напорниот ден си легнуваш и не можеш да заспиеш, цела ноќ се вртиш. Повеќето возрасни не ги добиваат препорачаните седум-девет часа сон, а долгорочните ефекти од лишувањето од сон може да ги изложат луѓето на ризик од хипертензија, дијабетес, дебелина, депресија, срцев и мозочен удар, предупредува Националниот институт за здравје. Но, доколку сакате да ги избегнете таквите проблеми, експертот за спиење Макс Кирстен предлага да го испробате данскиот метод на спиење.
Техниката позната како хиге создава удобно опкружување за спиење така што ја одржува спалната соба на ниска температура, но се употребува топла постелнина.
– Идејата е да уживате во контрастот помеѓу студената соба и топлината на креветот, подобрувајќи го целокупното искуство за спиење. Тоа е во согласност со идејата дека малку поладна собна температура, околу 15-20 степени, е погодна за подобар сон за многу луѓе. Вообичаено е да се чувствувате сонливо по изложување на студено време, што може да им се припише на неколку физиолошки реакции. Кога се соочуваме со студено време, телото се вклучува во терморегулација, процес што вклучува прераспределба на протокот на крв за да се одржи внатрешната температура. Притоа се јавува периферна вазоконстрикција, стеснување на крвните садови во екстремитетите за да се зачува топлината, што може да доведе до намалување на целокупното ниво на енергија. Покрај тоа, студеното време и намалената изложеност на природна светлина може да влијаат на деноноќниот ритам, стимулирајќи го ослободувањето мелатонин, хормон што ги регулира циклусите на спиење и будење. Телото исто така може да користи повеќе енергија за да генерира и одржува топлина во постудени услови, што придонесува за зголемен замор – вели Макс Кирстен.
Така, студените услови може позитивно да влијаат на спиењето поради неколку причини. Тоа вклучува регулирање на температурата, централната температура на телото природно се намалува како дел од деноноќниот ритам за да се олесни спиењето, и подобра средина за спиење – некои луѓе сметаат дека контрастот помеѓу студената спална соба и топлата постелнина е клучен фактор за создавање удобна и привлечна средина за спиење.
– Ова е во согласност со данскиот концепт на хиге, кој нагласува создавање топла, пријатна атмосфера – вели Кирстен.
Исто така излегувањето надвор по стемнување може да го стимулира производството на мелатонин.
– Природното намалување на амбиенталната светлина за време на постудените месеци може да ги поддржи природните процеси на спиење на телото. Свежиот воздух генерално има повисоки нивоа на кислород, што може да промовира подобра циркулација на крвта и оксигенација на ткивата, вклучувајќи го и мозокот, што позитивно влијае на квалитетот на сонот. Создавањето оптимална средина за спиење вклучува наоѓање правилен баланс на температурата, постелнината и другите фактори што придонесуваат за лична удобност и релаксација – заклучува Макс.
