Во време кога технологијата ги зазема сите сфери на животот, начинот на точење гориво во резервоарите за автомобили сè уште е механички процес, кој бара човечка активност. Меѓутоа, данската компанија „Аутофуел“ сака да го промени тоа.
„Аутофуел“ разви роботски систем за полнење гориво што ја елиминира потребата од возач или вработен на бензинска пумпа. Системот се состои од роботска рака што точи гориво, како и апликација преку која се идентификуваат клиентот и плаќањето, така што целиот процес се одвива без раце. Овој систем е олеснување за корисниците, но и значителна помош за инвалидите.
Од компанијата наведуваат дека процесот на полнење гориво не е променет во последните 70 години, додека технологијата се развила многу брзо, така што денес имаме брз интернет, мобилни телефони, асистенти со вештачка интелигенција и самоуправувачки автомобили.
Роботското полнење гориво е растечка дејност, а само на европскиот пазар се очекува раст до 50 милијарди долари до 2028 година.
Корисникот треба да креира профил за да ги регистрира деталите за автомобилот, како моделот и типот на гориво, деталите за плаќање и регистарскиот број. Меѓутоа, автомобилите што го користат системот мора да имаат специјално капаче на резервоарот за да функционира процесот. На екранот ќе се прикажат упатства за паркирање на автомобилот на соодветно место за да се изврши процесот на полнење гориво.
Роботската рака потоа ќе го отвори капачето на резервоарот и ќе ја стави млазницата во резервоарот. На купувачот ќе му бидат прикажани информации за процесот на полнење гориво и ќе види порака на екранот кога роботот ќе го заврши процесот. Возачот ќе може да го продолжи патувањето откако ќе се вклучи зеленото светло, кога роботот ќе го затвори капачето на резервоарот. Во меѓувреме се спроведува процесот на плаќање гориво.
Роботскиот систем ќе може да се користи за алтернативи, како електрична енергија, водород, компресиран природен гас и течен природен гас. Сепак, клиентот секогаш ќе може да избере помеѓу рачно и автоматско сервисирање.
Од друга страна, ова решение наскоро ќе стане неопходно кога по патиштата ќе почнат да се движат автономни автомобили.
