Жителите на селото Инакадате во северна Јапонија најдоа начин како да им го привлечат вниманието на туристите кон нивниот дом. Имено, секоја година од 1993 година, тие прават уметнички дела на локалните оризови полиња. Тие се нарекуваат „тамбо ато“ и се создаваат со садење различни сорти ориз во полето, така што формираат човечки фигури или други форми. Во лето, кога оризот доволно израснува, дадените уметнички дела може да се распознаат кога се гледаат од височина.
Во делата најчесто се прикажани мотиви од јапонскиот фолклор, популарната култура на оваа земја, но и познати кадри од холивудските филмови, како „Однесено со виорот“, „Војна на ѕвездите“ и „Празник во Рим“. Тие се дизајнирани од Ацуши Јамамото, поранешен професор во локално средно училиште. Тој прави дизајнерски нацрти на својот компјутер, прво избира фотографија или графика што ќе ја формира, а потоа ја менува со отстранување на непотребните детали и намалување на бројот на бои на седум. Потоа, околу 1.300 волонтери уредуваат садници од ориз според упатствата на Ацуши.
Завршеното „тамбо ато“ може да се види од средината на јуни до почетокот на октомври, но неговите креатори препорачуваат да ги погледнете во јули, кога неговите бои изгледаат најдобро. Полето може да се набљудува од специјално изградените набљудувачки пунктови во близината на полето.
