Топлотните бранови ја зголемуваат потрошувачката на вода во шишиња, а јавните фонтани значително можат да придонесат за намалување на пластичниот отпад
Со доаѓањето на летниот период почнуваат проблеми со претерано високи температури и поголеми потреби за вода. Овој проблем е особено изразен кога сме на отворено и сме изложени на сончева светлина. Со промените во климата, летото станува потопло, а со нив и појавата на топли бранови е почеста. За време на такви периоди, честопати можеме да видиме резервоари со вода за разладување во многу градови. Сепак, еден од начините да се освежиме е да консумираме вода од јавни чешми. Нивната важност не е само во разладувањето, иако е нивна примарна цел, но тие можат да поттикнат раст на свеста кај граѓаните за потребата од намалување на пластичниот отпад.
Топлотните бранови ја зголемуваат потрошувачката на вода во шишиња. Поради промените на климата, граѓаните се принудени да имаат вода со себе во топлите денови. Оваа негативна последица од климатските промени доведе до прекумерна набавка на амбалажирана вода, чие пластично пакување најмногу завршува како отпад. На тој начин, граѓаните, задоволувајќи ги своите потреби, практично доведуваат до создавање нов проблем.
Податоците од Велика Британија покажуваат дека за време на топлотниот бран во 2006 година, продажбата на амбалажирана вода во некои супермаркети се зголемила двојно, додека во 2018 година, е забележана рекордна продажба на амбалажирана вода во оваа земја.
Како одговор на проблемот со растот на пластичен отпад, Велика Британија одлучи да одговори со поголем број места каде што може да обезбеди јавни чешми и фонтани за пиење вода. Пример за ова е Лондон. Гледајќи ги проблемите со растот на отпадот, градската администрација пред неколку години одлучи со пилот-проектот да постави јавни фонтани. Вкупно 20 нови јавни фонтани имаа цел да ги принудат граѓаните да го намалат купувањето шишиња и да ја реупотребат амбалажата на постојните и новите јавни фонтани. Со оглед на позитивниот став, граѓаните на Лондон добија уште 50 јавни фонтани во вредност од околу пет милиони фунти. Новите чешми се поставени на фреквентни места, како трговски центри, метро-станици, но и места за спорт и рекреација.
Европа исто така е погодена од топлотни бранови од година на година. Поради двојниот проблем во форма на климатски промени, но и негативното влијание врз животната средина, реагираше и Европската комисија. Имено, препознавајќи го јасниот недостиг од овие објекти, Европската комисија им предложи на националните влади членки да го зголемат бројот на јавни фонтани и со тоа да го намалат загадувањето. Според некои анализи, домаќинствата во ЕУ трошат над 600 милиони евра годишно со купување пластични шишиња со вода. Следејќи ги препораките, се појавија нови јавни фонтани во многу европски градови, кои исто така претставуваа интересни архитектонски решенија.
Јавните фонтани во Љубљана исто така се одличен пример, која со право беше прогласена за зелена престолнина на Европа во 2016 година. Имено, Љубљана, со речиси 300.000 жители, значително го зголемила бројот на јавни фонтани во последните неколку години. Она на што тие посветиле особено внимание е нивната стратегиска локација, така што сите делови на градот се еднакво опфатени со овие објекти. Исто така, една важна работа со овој град е можноста за користење мобилна апликација преку која можете да видите колку сте далеку од најблиската јавна фонтана. Јавните фонтани неизбежно претставуваат значајна културна традиција на многу градови. Нивното социјално значење е неоспорно, особено затоа што тие можат да придонесат за намалување, пред сè, на пластичниот отпад.
Според податоци од 2019 година, на територијата на Скопје има околу 220 јавни фонтани и чешми, а ЈП „Водовод и канализација“ е одговорно за 180 јавни чешми во градот.
