Почина Кристијан Болтански
Францускиот концептуален уметник Кристијан Болтански, познат по своите дела во кои ги обработуваше прашањата за смртта и меморијата, почина на 14 јули во Париз на 77-годишна возраст. Веста за смртта на Болтански ја објави галеријата „Маријан Гудман“, со која соработуваше со години.
– За време на неговата 60-годишна кариера како идеен уметник, Кристијан доби меѓународно признание за неговите уникатни размислувачки и медитативни одговори на животот и неговите патувања, изразувајќи ги во форма на инсталации, скулптури, слики, филм, звук, кои му служеа како еден вид прибежиште – велат од галеријата МГ, која ја претставува од 1987 година.
Роден во Париз во 1944 година, само една недела по ослободувањето од нацистичката окупација, Болтански беше син на еврејски лекар од украинско потекло и Французинка, која мораше да го скрие сопругот на таванот во семејната куќа и се преправаше дека е разведена. Ужасите на холокаустот подоцна станаа основа на уметничката практика на Болтански, кој зборуваше за прашањата на загубата, меморијата и смртта во своите монументални инсталации, понекогаш реконструирани од фотографии на еврејски деца од Втората светска војна.
Двапати учествувал на изложбата „Документа“ (1972 и 1977) и дури шест пати на Биеналето во Венеција од 1975 до 2015 година. Имаше изложби во најголемите уметнички институции во светот. Не сакаше ретроспективи.
– Кога ќе ви понудат ретроспектива, тоа практично значи дека сте мртви – изјави во едно интервју.
Во 2009 година, Болтански му го „продаде својот живот“ на колекционерот Дејвид Волш, кој се обврза да плати за серија 24-часовни филмови за неговата работа во студиото. Ова значеше дека колку подолго живее Болтански, толку повеќе Волш ќе треба да плати.
По повод неодамнешната изложба „Апрес“ во галеријата „Маријан Гудман“ во Париз, организирана непосредно по ретроспективата во центарот „Помпиду“ во 2020 година, критичарот Томас Вебер ги прокоментира последиците од пандемијата врз Болтански.
– Со воздржувањето од директно фокусирање на пандемијата, Болтански успешно ја внесе во неговиот материјален вокабулар и го поништи пристапот кон траумата и историјата. Тој го подведе сегашното време под ужасите од минатиот век, кои беа неговата централна тема – изјави Вебер.
