Изложбата „Навезени спомени“ во чест на великанот
Изложбата „Навезени спомени“ ќе биде отворена денеска, во 13 часот, во Музејот на Македонија. На изложбата се презентирани 53 најкарактеристични народни везови, од различни етногеографски области на нашата земја. Везовите, кои се поставени во 30 рамки, претставуваат значајно сведоштво за креативноста, оригиналноста и вештината на жената везилка, но и за традицијата што со векови се пренесувала од колено на колено.
Изложбата е поставена во чест на нашиот реномиран и меѓународно признаен поет Блаже Конески. Со отворањето на изложбата, музејот дава свој придонес кон одбележувањето на 100-годишнината од раѓањето на втемелувачот на современата македонска филологија и лингвистика. Автор на изложбата и каталогот е кустос-советникот Горданче Видиниќ.
– Неслучаен бил поривот на нашиот голем, но и светски признаен поет Блаже Конески да ја воспева македонската жена. Во песните „Везилка“ и „Убавите жени“, тој ги воспева нејзините најдобри, единствени и неприкосновени вредности: улогата на мајка, чувар на куќата и домот, вредна домаќинка, но и исклучително инвентивна и талентирана жена, везилка. Тоа се неговите најубаво испеани стихови за неа, за жената, за мајката, за сите мајки посветени докрај на домот, на семејството и сите потреби што произлегувале од него во секојдневниот живот – вели Горданче Видиниќ.
Везовите најпрво биле создавани во мечтите на жената везилка, а потоа, со вештината на рацете, со љубовта на срцето и чувството за убавина, ред по ред вези, ред по ред сонувај, дури докрај не се отсонува сонот што треба да биде ставен на платно, и тоа одопаку, токму како што е поголемиот дел од македонските везови.
– Везејќи, таа ја изразувала својата распнатост помеѓу емоциите и секојдневниот живот, како: љубовта, изневерувањето и неостварливоста на истата таа, осаменоста, тагата поради минливоста на животот, стравот од смртта, желбата да се открие мудроста на животот и да се извлече она најубавото од него, за да се почувствува сета полнота и убавина на живеењето. Преку нив, таа ги раскажала своите најдлабоки чувства, ја извезла својата животна приказна проткаена со среќа и тага, со болка и радост, копнеж и надеж, одважност и храброст, стравови, сомнежи и јанѕи, чувства коишто постојано се испреплетувале и се испреплетуваат во секој човек – вели Видиниќ.
