По повод Меѓународниот ден за сеќавање на жртвите од холокаустот, 27 Јануари, во Меморијалниот центар на холокаустот на Евреите од Македонија е отворена изложбата „Аушвиц – место на Земјата: Албум со фотографии од Аушвиц“. Изложбата е во организација на Фондот на холокаустот на Евреите од Македонија и Еврејската заедница, со цел да се прикаже единствената позната визуелна документација за пристигнувањето на транспортот на Евреите во Аушвиц-Биркенау.
На отворањето се обратија Горан Садикаријо, директор на ФХЕМ, и амбасадорките на Израел, Симона Франкел, и на Германија, Петра Дрекслер. Изложбата е раскажана и продуцирана од Секторот за патувачки изложби, Оддел за музеи, „Јад Вашем“.
На настанот Сашо Георгиевски, декан на Правниот факултет при УКИМ, им додели сертификати на учесниците на курсевите за изучување на холокаустот на Правниот факултет „Јустинијан Први“, реализирани со поддршка на Конференцијата на еврејските материјални побарувања од Германија – Њујорк.
Меѓународниот ден за сеќавање на жртвите од холокаустот е посветен на сеќавањето на трагедијата на холокаустот за време на Втората светска војна, во кој систематски биле убиени шест милиони Евреи во логорите на смртта, организиран и спроведен од нацистичкиот режим, неговите сојузници и соработници. Историски овој ден е поврзан и со ослободувањето на нацистичкиот концентрационен логор Аушвиц-Биркенау на 27 јануари 1945 година.
