Детскиот германски филм „Макс и бесната дружина“, во режија на Винфрид Елснер, од денеска ќе игра во повеќе киносали низ земјава. Проекциите почнуваат вечерва, во 18.30 часот, во киното „Милениум“ во Скопје и во 19 часот во центарот за култура „АСНОМ“ во Гостивар. Утре и в сабота, пак, „Макс и бесната дружина“ ќе се прикажува во Кинотеката од 15 часот, како и во Центарот за култура во Битола од 18.30 часот. Проекции на филмот ќе има и во Културниот и информативен центар во Македонска Каменица на 25-ти месецов, како и во домот на културата „Иван Мазов-Климе“ во Кавадарци и во центарот за култура „Ацо Ѓорчев“ во Неготино до крајот на јануари.
Станува збор за крими-авантуристички семеен филм, по сценарио на Винфрид Елснер и Лиса Мари Дикрајтер. Филмот имаше премиера на фестивалот „Блек најтс“ во Талин, во 2020 година, и беше номиниран за награда. Улогите ги толкуваат Јона Ајзенблетер, Уши Глас, Мариа Хаалмер, Томас Тиме, Стела Брикнер, Алвара Хефелс, Нина Петри, Лео Ницка. Младиот протагонист е деветгодишниот Макс, кој живее во дом за стари лица сместен во замокот Геролдсек, каде што неговата мајка работи како медицинска сестра. Макс исто така забележува дека нешто чудно се случува во старите ѕидови на домот. Изгледа дека мистериозен крадец краде скапоцености од собите на жителите среде бел ден. Меѓу осомничените е и мајката на Макс, на која ѝ се заканува отказ. Тој брзо ќе се спријатели со неколку од постарите жители на домот: актерката Вера, фудбалскиот тренер Хорст и истражувачот Килијан, попознати како Бесната дружина. Заедно ќе го изведат вистинскиот крадец пред лицето на правдата.
Дистрибутер на филмот е „Катавеј“, а дистрибуцијата на филмот е овозможена од „Герман филмс“ и потпрограмата „Медиа Креативна Европа“.
