Неформалната група „Дума ин Сума“, создадена од компаратистките Ивана Смилевска и Марија Бошковска, заедно со младиот визуелен уметник Дарко Алексовски, организира дводневна работилница за креативно пишување за млади од 15 до 19 години, насловена „кЛИК, сЛИК – сподели кирилица“. Работилницата ќе се одржи во културниот центар „Јадро“ на 14 и 15 септември, а заинтересираните ќе имаат можност да создадат свој книжевен лик, употребувајќи дигитални алатки.
– Ѕвончето веќе заѕвони за првиот час, ајде пак да се дружиме на кирилица. Како продолжение на работилницата „Пиши-бриши… само не оставај на seen“, овој пат ќе создаваме свои светови и ликови, користејќи дигитални алатки и еден тон имагинација. Сигурни сме дека ги прочитавте лектирите, па ајде да откриеме интересни писател(к)и! Првиот ден од работилницата ќе го поминеме во истражување на современата македонска книжевност, ќе ѕирнеме во различни уметнички форми и ќе користиме слики како инспирација за креативно пишување. На вториот ден од работилницата ќе ги оживееме нашите книжевни ликови и ќе печатиме мали книгички – зинови. Што е фанзин? Мала книгичка, или фанзин е неофицијално издание создадено ентузијастички и панкерски, по „направи сам“ техника, а обработува одреден културен феномен, како на пример литературен или музички жанр. Фанзините се користат за споделување идеи и креативно изразување – велат од неформалната група „Дума ин Сума“.
