Во американскиот Сенат се подготвува резолуција според која ако Русија употреби нуклеарно оружје во Украина тоа ќе ја вклучи одбранбената клаузула на НАТО и ќе се смета за напад врз воената алијанса.
Демократскиот сенатор Ричард Блументал од Конектикат, и републиканецот Линдзи Греам од Јужна Каролина, во Сенатот регистрираа нацрт резолуција според која „каква и да било употреба на тактичко нуклеарно оружје од страна на Русија, Белорусија или нивни агенти, или уништување на нуклеарна постројка што ќе доведе до испуштање на радијација на територијата на НАТО предизвикувајќи значајна штета по животот на луѓето, ќе предизвика итен одговор вклучувајќи имплементација на Статија пет од Северноатлантскиот договор“.
– Нашата порака до оние околу Путин е ако го сторите тоа, ако ги спроведете неговите наредби ако тој некогаш ги даде, треба да очекувате масивен одговор од НАТО, и ќе се најдете себеси во војна против НАТО – изјави Греам синоќа на прес конференција посветена на нуклеарните закани од страна на Русија.
Нацрт-резолуцијата доаѓа во време кога Русија распоредува нуклеарно оружје кај сојузникот Белорусија која се граничи со Украина, и постојаната загриженост за состојбата на нуклеарната централа Запорожје које е во центарот на воените дејствија во Украина.
Истовремено, украинскиот претседател Володомир Зеленски изјави дека Украина на меѓународните партнери им доставила целосни информации за ситуацијата околу нуклеарната централа „Запорожје“ и акциите на руските сили.
– Одржавме брифинг за нашите партнерски земји за ситуацијата во нуклеарната централа „Запорожје“. Имаше претставници на земјите од Г7 и Г20, како и претставници на меѓународни организации. Овде, во канцеларијата. Дирекцијата на Генералното разузнавање, тимот на Канцеларијата, нашите дипломати обезбедија достапни информации. Нашиот принцип е едноставен: светот мора да знае што прави окупаторот. Секој што знае мора да дејствува – рече Зеленски во своето редовно ноќно обраќање до граѓаните.
Тој посочи дека никој во светот не треба да има илузии за Русија „по рускиот терористички напад на ХЕ Каховка и намерните терористички напади врз други брани и енергетски објекти“.
– Русија е таа што сега е глобален центар на цинизмот и секоја наредба за секое зло за кое тие се надеваат дека ќе прикрие катастрофа може да дојде од таму. Светот има доволно моќ да спречи какви било инциденти со радијација, а камоли катастрофа со радијација – посочи Зеленски и додаде дека разузнавачките служби на различни земји можат да дадат соодветни сигнали и да го извршат потребниот притисок.
Тој истакна дека Украина ќе продолжи да ги информира своите партнери, како и дека информациите ќе бидат доставени до оние земји кои одржуваат одредена неутралност.
– Очигледно, радијацијата не прашува кој е неутрален и може да допре до кого било во светот. Според тоа, сега секој во светот може да помогне и сосема е јасно што треба да се направи – рече Зеленски.
Украинскиот претседател претходно изјави дека Руската Федерација го разгледува сценариото за терористички акт во нуклеарната централа Запорожје и дека веќе има подготвено се за тоа, што Кремљ го демантираше.
