Хрватска
Пазарните нарушувања предизвикани од глобалната криза со снабдувањето генерално, особено кога станува збор за храната, го наметнуваат прашањето за ниското ниво на хрватска самодоволност во многу производи, од месо, млеко, добиточна храна до жито, брашно, леб и други пекарски производи. Поради тоа, во затворениот дел од вчерашната седница, Владата одлучи да ги обнови стратегиските резерви, со кои може да се интервенира на пазарот на храна во случај на поголеми нарушувања.
Детали за оваа одлука не се објавени бидејќи стратегиските резерви се заштитени со тајност, но министерката за земјоделство Марија Вучковиќ по седницата најави дека се планира вонредна набавка на стратегиски добра во вредност од 594,6 милиони куни (околу 78,5 милиони евра). Таа откри и дека е проценето дека е неопходна набавка на пченка, пченица, свинско и мисиркино месо, семе од пченка и пченица и масло, млеко и јајца.
– Хрватска ќе направи сѐ што е потребно за да придонесе за безбедност на храната на граѓаните и да им се овозможи работа на хрватските земјоделци и рибари – рече министерката.
На отворениот дел од седницата беше донесена одлука да се пуштат на пазарот 22.000 тони дизел-гориво од стоковните резерви, што, според министерот за економија Томислав Чориќ, е 4,07 дена просечен дневен нето-увоз или околу 4 отсто од задолжителните резерви. Причината за ова ослободување, сепак, не е нарушување на пазарот, туку желбата да се поддржи одлуката на Меѓународната агенција за енергија (ИЕА), која на почетокот на март се согласи да ослободи 60 милиони тони нафта од задолжителните резерви. Иако Хрватска не е членка на агенцијата, Владата рече дека треба да учествува во координираната акција, во духот на европската солидарност и кохезија, објасни Чориќ.
