Тврди „Њујорк тајмс“
Администрацијата на американскиот претседател Џо Бајден веќе 10 дена го повикува израелскиот премиер Бенјамин Нетанјаху да направи хуманитарна пауза во војувањето по нападот врз Газа. Во исто време, Белата куќа се надева дека годишната воена помош од 3,8 милијарди долари ѝ дава доволно тежина да влијае на тактиката на израелскиот лидер, пишува „Њујорк тајмс“.
– Сепак, се покажа дека тоа не е така. Во вчерашниот телефонски разговор Нетанјаху ги отфрли повиците на Бајден да стори повеќе за да спречи цивилни жртви. Тој ја продолжува кампањата на силна одмазда за нападот на 7 октомври користејќи моќни бомби за да ги уништи тунелите на Хамас додека уништува станбени области во Газа – посочува американскиот весник.
Во Украина врховниот командант на украинските вооружени сили, Валериј Залужни, минатата недела изговори збор што американските власти по секоја цена го избегнуваат поголемиот дел од годината: ќор-сокак, се наведува во написот.
Многумина од соработниците на Бајден се согласуваат дека Украина и Русија се добро вградени во своите позиции и не може значително да ја поместат линијата на фронтот.
Во секој случај, пишува „Њујорк тајмс“, способноста на Бајден да влијае на тоа како неговите сојузници ги водат своите битки изгледа поограничена отколку што може да се очекува, со оглед на тоа што Америка е нивниот главен снабдувач на оружје и на разузнавачки информации.
– Одамна американските претседатели сфатија колку мало влијание имаат врз Израел – многу помалку отколку што мислеа. Прво, ова е нивна борба, дури и ако имаме голем облог за исходот на конфликтот – рече конгресменот Сет Молтон, додавајќи дека истото тоа може да се каже и за Украина.
„Њујорк тајмс“ пренесува дека Соединетите Американски Држави се тесно поврзани со двата конфликта бидејќи се најмоќниот сојузник на Израел и најдобрата надеж на Украинците за зачувување на слободата и независноста на земјата. Затоа политичката иднина на американскиот претседател е тесно поврзана со тоа како ќе дејствуваат овие земји и како ќе завршат нивните вооружени конфликти.
