Откако беше откриено дека данската разузнавачка служба соработувала со американската во обемното прислушување на европските службеници, се јави и свиркачот Едвард Сноуден.
Тој на Твитер им сугерираше на европските официјални лица за таа работа да го прашаат американскиот претседател Џо Бајден, кој беше потпретседател на САД во времето на шпионажата.
– Бајден е подготвен да одговори на тоа кога наскоро ќе ја посети Европа, бидејќи, се разбира, тој беше длабоко вмешан во првичниот скандал. Треба да има експлицитно барање за целосно јавно откривање, не само од Данска, туку и од нивниот постар партнер – напиша Сноуден.
Германската канцеларка Ангела Меркел и претседателот Франк-Валтер Штајнмаер се меѓу оние кои беа шпионирани од Американската агенција за национална безбедност (НСА) и чии разговори беа прислушувани со помош на данската разузнавачка агенција ФЕ.
Соунден беше тој што уште во 2013 година откри дека Американците не само што ги шпионираат своите граѓани туку и лидерите на други земји, и тој објави дека американските власти го прислушуваат приватниот мобилен телефон на Ангела Меркел.
Медиумите сега стигнаа до внатрешните извештаи на данската ФЕ и со тоа ги потврдија тврдењата на Сноуден.
Сноуден, кој му откри на светот дека САД шпионираат наоколу, во времето кога Бајден беше потпретседател, вели дека сегашниот претседател на САД е добро подготвен да одговори на обвинувањата кога ќе патува низ Европа, бидејќи тој е длабоко вмешан во скандалот.
Германија бара појаснување дали САД ја шпионирале Меркел
Германската влада се јави по повод обвинувањата дека САД, користејќи го партнерството со Данска, ја шпионирале германската канцеларка Ангела Меркел и други европски претставници.
– Федералната влада го зеде предвид овој извештај и е во контакт со релевантни национални и меѓународни чинители за појаснување – рече портпаролот Стефен Зајбер, но одби да коментира понатаму за наводите за шпионажа.
Данската државна телевизија ДР објави дека Американската национална разузнавачка служба (НСА) ја користела данската разузнавачка служба за да шпионира службени лица во Европа, вклучувајќи ја и германската канцеларка.
Ова го покажуваат резултатите од внатрешната истрага од 2015 година за партнерството со НСА, што ја спроведе данската разузнавачка служба, објави ДР.
Според овие обвинувања, НСА користела дански разузнавачки врски за да шпионира политичари во Норвешка, Шведска, Франција и Германија.
Францускиот претседател Емануел Макрон изјави дека се чека објаснување и дека шпионирањето на сојузниците е неприфатливо.
Данскaта министерка за одбрана Трине Брамсен одби да ги коментира „шпекулациите во медиумите“.
