Белорусија ќе пропадне ако се согласиме да има повторување на претседателските избори, порача претседателот Александар Лукашенко, на денешниот митинг пред своите приврзаници во Минск.
– Раководството на НАТО нѐ повикува да одржиме нови избори. Ако тоа го прифатиме, ќе пропаднеме како држава – истакна Лукашенко.
Тој смета дека изборите биле валидни, бидејќи, според него, не може да се фалсификуваат 80 проценти од поддршката. Лукашенко им се заблагодари на сите што дошле на митингот, додавајќи дека не сака митинзи, но дека морал да го повика народот на помош.
Тој потсети дека во неговото време Белорусите првпат во историјата изградиле независна држава и додаде „ако Белорусите сакаат реформи, утре ќе ги започнеме“.
Лукашенко клекна пред насобраните и им се заблагодари.
– Првпат во животот сум на колена пред вас. Вие тоа го заслуживте – им порача на граѓаните.
Вчера, Лукашенко изјави дека се договорил со рускиот колега Владимир Путин, за давање помош во случај тоа да биде потребно.
