Будимпешта беше домаќин на инаугуративниот Турнир на кандидатите, двокружен турнир со 10 играчи. Оваа традиција продолжи речиси секоја трета година, до 1993-та, раните 1990-ти доживеаја нарушување поради поделбата во структурата на светскиот шампионат, а Турнирот на кандидатите се врати на важност во 2007 година, како дел од обединетиот циклус. Следното поглавје во оваа голема приказна за шахот е во Торонто (од 2 до 22 април)
ИСТОРИЈА НА ТУРНИРОТ НА КАНДИДАТИТЕ (1)
Турнирот на кандидатите, последниот тест што шахистот мора да го помине за да го предизвика светскиот шампион во шах, има богата историја, која датира од 1950 година. Овој настан се појави како одговор на потребата од систематски пристап за одредување на предизвикувачот на светскиот првак. Пред 1950 година кандидатите мораа да се движат низ лавиринтот од преговори директно со шампионот, да обезбедат финансирање и да организираат меч, односно процес што немаше структура и конзистентност, пишува Светската шаховска федерација (ФИДЕ). Во пресрет на годинашниот Турнир на кандидатите ви ги претставуваме досегашните циклуси на натпревари за предизвикувач на светскиот првак.
ПРЕСВРТ ВО 1950 ГОДИНА
Пресвртот дојде во 1950 година, кога Будимпешта беше домаќин на инаугуративниот Турнир на кандидатите, двокружен турнир со 10 играчи за да се избере предизвикувач за тогашниот светски шампион, Русинот Михаил Ботвиник. Оваа традиција, поставена во Будимпешта, продолжи речиси секоја трета година, односно до 1993-та, наизменично помеѓу турнири и натпревари. Сепак, раните 1990-ти доживеаја нарушување поради поделбата во структурата на светскиот шампионат. Турнирот на кандидатите се врати на важност во 2007 година, како дел од обединетиот циклус, првично во форма на натпревари, пишува ФИДЕ. Современата ера е сведок на значајни турнири одржани во Лондон во 2013 година, Ханти-Мансијск во 2014-та, Москва во 2016-та, Берлин во 2018-та, Екатеринбург во 2020 и 2021 година и во Мадрид во 2022 година, а секој од нив придонесува за славната историја на процесот квалификации за првенството. Следното поглавје во оваа голема приказна за шахот е во Торонто (од 2 до 22 април).
ВОВЕДНИОТ ТУРНИР ВО БУДИМПЕШТА
Воведниот турнир на кандидатите се одржа во Будимпешта, од 11 април до 18 мај 1950 година, двокружен турнир со 10 претенденти (Давид Бронштајн, Исак Болеславски, Василиј Смислов, Паул Керес, Мигуел Најдорф, Александар Котов, Гидеон Сталберг, Андор Лилиентал, Ласло Сабо и Сало Флор). Турнирот беше единствениот Турнир на кандидатите што заврши нерешено за првото место, без тајбрејк. Бронштајн и Болеславски потоа одиграа плејоф-меч, одржан во Москва во 1950 година. Тој заврши со уште едно реми, но Бронштајн го доби првиот одлучувачки дуел и стана официјално предизвикувач на светскиот првак. Тој потоа ремизира со Ботвиник, кој ја задржа титулата, оти изедначениот резултат во тоа време го фаворизираше шампионот. Г.И.
(Идната недела: Турнирите во Холандија, СФР Југославија…)
