Директорот на тимот Хаас смета дека ГПС, фотографии од камера и друга технологија треба да се користат за да се одлучи редоследот на болидите ако е потребно црвено знаме пред да се заврши тајминг-секторот
ФОРМУЛА 1
Гинтер Штајнер сака Светската автомобилска федерација (ФИА) повторно да процени како одлучува за наредбите за рестартирање трка во Формула 1 доколку е потребно црвено знаме пред да се заврши тајминг-секторот, пишува „Скај спорт“. Изјавите на директорот на тимот Хаас доаѓаат по финишот на трката во Австралија. Повторното стартување со два круга пред крајот на трката во Мелбурн доведе до повеќе инциденти на свиоците еден и два, што резултира со трето црвено знаме на трката, пишува „Скај спорт“.
Спортските регулативи на Ф1 наведуваат дека ако трката биде прекината, „во сите случаи редоследот ќе се земе на последната точка во која е можно да се одреди позицијата на сите болиди“. Бидејќи болидите не го поминаа првиот тајминг-сектор, директорот на трката Нилс Витич реши да го врати редоследот од пред рестартирањето за да го комплетира преостанатиот круг зад безбедносното возило.
Хаас беше најголемиот губитник од одлуката, бидејќи Нико Хулкенберг скокна до четвртото место откако избегна контакт и ќе беше во конкуренција за неговиот и првиот подиум на тимот по казната од пет секунди на Карлос Саинз, пишува „Скај спорт“. Германецот потоа беше седми. Американскиот тим вложи протест против резултатот, кој го отфрлија стјуардите. Во тој поднесок Хаас ги посочи ограничувањата на системот ГПС, а Штајнер би сакал да го види комбиниран со друга технологија за да се обиде да ги направи работите појасни за гледачите, пишува „Скај спорт“.
– Со технологијата што ја имаме денес, ГПС е доволно прецизен, користиме ГПС за синото знаме, на пример. Велат дека не е доволно прецизно за завршна позиција, но дека е доволно прецизно за сино знаме. Треба да размислиме што е, а што не е. Навистина мислам дека треба многу да се размислува. Можевме да замрзнеме сѐ, преку камера и преку ГПС, токму во моментот кога излезе црвеното знаме. Мислам дека тоа ќе се појави на нашата следна комисија за Ф1 неделава. Ајде да видиме што ќе се случи, луѓето се многу помалку отворени на вакви состаноци за тоа, но секој ќе има свое мислење. Мислам дека, генерално, тоа треба да го направиме за гледачите. За мене, најголемата работа беше да ги натерам луѓето да чекаат половина час за резултат на трката, знаејќи дека тоа повеќе нема да се промени. Требаше само да одиме околу уште еден и пол круг – изјави Штајнер за „Скај спорт“.
Штајнер исто така размислува дали ФИА можеше само да го искористи безбедносното возило за да го одреди последниот еден и пол круг и затоа да ја отстрани потребата да се промени редоследот, наместо да се крене третото црвено знаме.
– Третото црвено знаме беше сосема непотребно и само го одложи крајот на трката за половина час. Сите знаеја на вториот рестарт дека ако има друго црвено знаме, трката ќе почне зад безбедносното возило и ќе оди докрај зад безбедносното возило. Зошто да не го извадиме безбедносното возило веднаш и да ја завршиме трката и да ги пуштиме сите да си одат дома? Мислам дека треба да има некои дискусии за тоа како можеме да го направиме ова подобро – рече Штајнер. Н.М.
