Следната генерација тренери се веќе на сцената и би рекол дека Алонсо е истакнат во тој оддел. Тој е поранешен играч од светска класа, од тренерско семејство, што малку помага, тој беше како тренер уште кога играше. Фудбалот што го игра, тимовите што ги формира, трансферите што ги направи, тоа е апсолутно исклучително, рече Клоп, пренесе „Би-би-си“. Алонсо е поранешен фудбалер на Ливерпул, Реал Мадрид и на Баерн, а сега е тренер на Баер, лидерот во Бундеслигата, во неговата прва тренерска работа на највисоко ниво. „Многу искусна личност, која може да види многу работи пред да ги видат другите луѓе. Не е најгласниот човек во собата, но обично е најпаметниот“, рече Пизаро, соиграч на Алонсо од Баерн
ФУДБАЛ
Кога Чаби Алонсо се пензионира, пораките од фудбалските великани се слеваа. Една од Пеп Гвардиола се истакна. „Уживај во слободното време. Но, се обложувам дека по шест месеци ќе бидеш нестрплив да почнеш да се подготвуваш за животот како тренер“, рече Гвардиола, пренесе „Скај спорт“.
Сите знаеја дека Алонсо ќе биде тренер. Не стануваше збор само за начинот на кој тој се однесуваше кон играта, иако тоа беше најава. Тоа беше неговата непоколеблива љубопитност, како што рече Гвардиола, дополнета со вистинска сериозност. Го правеше фудбалот да изгледа забавно, но му пристапи како да е работа.
Клаудио Пизаро го носеше дресот со бројот 14 во Баерн и тоа го доведе во судир со Алонсо, кој го носеше тој број во Ливерпул и во Реал Мадрид. Тоа беше тема на нивниот прв разговор.
– Тој рече дека треба да разговараме за бројот – вели Пизаро.
Алонсо мораше да чека една година за дресот, но Пизаро со задоволство се сеќава на нивната заедничка сезона. Уште тогаш видел менаџер во него.
– Знаевме. Сите што играа со него знаеја. Тој секогаш ги насочуваше луѓето и разговараше со играчите. Беше добар лидер – вели Пизаро.
Сега Алонсо има 42 години.
– Многу искусна личност, која може да види многу работи пред да ги видат другите луѓе. Не е најгласниот човек во собата, но обично е најпаметниот – рече Пизаро.
Сите знаеја дека Алонсо ќе биде тренер, но тие не го предвидуваа ова, пишува „Скај спорт“. Ако Баерн некогаш се откажеше од титулата во Бундеслигата, Борусија Дортмунд требаше да биде таа што ќе ја освои. Тие имаа своја шанса во минатата сезона. Ако не Борусија Дортмунд, тогаш Лајпциг, можеби, но не и Баер, пишува „Скај спорт“. Кога Алонсо беше назначен за тренер на Баер во октомври минатата сезона, задачата беше да го задржи клубот во Бундеслигата, а не да ја освои. Но, сега, по повеќе од половина од сезоната, тимот од Леверкузен води.
БАЕР Е НЕПОРАЗЕН СЕЗОНАВА
Резултатите се извонредни. Баер останува непоразен во сите натпреварувања сезонава, единствениот тим во Европа. Но, начинот на кој тој се снаоѓа со предизвиците на оваа прва работа од врвната дивизија е тоа што толку импресионира. Алонсо во минатата сезона се потпре на контранапад за да го одведе тимот подалеку од зоната за испаѓање, користејќи ја брзината во нападот. Со текот на времето се ставаше поголем акцент на сложената игра со додавања, но, сепак, ова е тим што може да победи на повеќе начини.
Сите знаеја дека Алонсо ќе биде тренер, но тие не можеа самоуверено да го предвидат овој пат во кариерата, бидејќи тој беше толку трпелив во изградбата на својата кариера, пишува „Скај спорт“. Неговото враќање во Сосиедад како тренер на Б-тимот на клубот беше повеќе од обична станица, тоа беа три години од неговиот живот, промоција и испаѓање. Имаше понуди од големи клубови во Европа пред да се одлучи за Баер и ќе има и поголеми сега.
– Тој може да успее каде и да посака. Кога ќе видите што прави во моментов во Леверкузен, можете да видите дека ќе биде одличен тренер. Тој секогаш разговара со играчите. Тој има искуство. Ќе видиме каде ќе оди – вели Пизаро.
Пред тоа, постои шанса да се испише историјата со Баер, клуб што никогаш досега не ја освоил Бундеслигата.
КЛОП: СЛЕДНАТА ГЕНЕРАЦИЈА ТРЕНЕРИ Е НА СЦЕНАТА, АЛОНСО Е ИСТАКНАТ ВО ТОЈ ОДДЕЛ
Тренерот на Ливерпул, Јирген Клоп, вели дека Чаби Алонсо се издвојува од новата генерација фудбалски тренери, пишува „Би-би-си“. Тимот на 42-годишниот тренер на Баер е на врвот во германската Бундеслига, пред Баерн, кој ги освои претходните 11 титули во Германија.
– Чаби работи неверојатна работа – изјави Клоп во петокот.
Алонсо помина пет сезони во Ливерпул од 2004 година и ги освои Лигата на шампионите, ФА-купот, Суперкупот на Европа и на Англија за време на неговиот престој во клубот, пред успешните периоди во Реал Мадрид и во Баерн.
Поранешниот играч од средниот ред го презеде Баер во 2022 година и тој останува непоразен во сите натпреварувања сезонава, води во Бундеслигата, се пласира во полуфиналето на германскиот Куп и во осминафиналето на Лига Европа.
Успехот на Алонсо во Германија, вклучувајќи ја и неодамнешната победа со 3-0 над ривалот за титулата Баерн, наводно го направи една од главните менаџерски цели за клубовите низ Европа.
– Колку е брз неговиот тим и толку добро наместен, според одвоеното време, тој стави свој соодветен печат на тоа. Следната генерација тренери се веќе на сцената и би рекол дека Чаби е истакнат во тој оддел. Тој е поранешен играч од светска класа, од тренерско семејство, што малку помага, тој беше како тренер уште кога играше. Фудбалот што го игра, тимовите што ги формира, трансферите што ги направи, тоа е апсолутно исклучително. „Диносаурусите“ ако сакате, Анчелоти, Мурињо, Гвардиола, можеби јас, нема да се снајдеме во следните 20 години. Во ред, можеби Мурињо ќе го направи тоа, но другите нема – рече Клоп, пренесе „Би-би-си“.
Клоп во јануари даде неочекувана најава дека ќе се повлече од Ливерпул налето, по девет години, велејќи дека „снемал енергија“. „Црвените“ водат сезонава во англиската Премиер-лига, со 57 бода, а потоа се Арсенал со 55, Манчестер сити со 53 (и еден меч помалку)… Н.М.
