На 20-те години додека бев на голот и примив толку многу голови можам да се сетам многу сликовито. Тие се врежани во мојот ум и психа. Го користам тоа за да им помогнам на центарфорите, за такви ситуации што ниту еден голман не би ги сакал, рече Ли Грант, тренер во Ипсвич. И тоа функционира, сезонава само Барнли во Англија постигнал повеќе голови од Ипсвич
ФУДБАЛ
Малку е познато за синдикатот на голманите, лоби-група што работи на маргините на фудбалот, ги штити своите членови, им одговара на критичарите и колективно извикува поддршка секојпат кога од корнер топката пристигнува во шеснаесетникот, пишува британски „Телеграф“. Ли Грант беше член во својата 22-годишна играчка кариера, но сега, како тренер во Ипсвич Таун, тој вели дека времето му истече.
– Сметам дека секој што ќе гледа една од моите сесии или ќе го слушне начинот на кој комуницирам со нашите напаѓачи, колку љубов им давам, ќе рече дека моето членство во синдикатот ќе биде отповикано. Мислам дека висам на конец во моментов – вели тој.
Грант го направи уникатниот чекор да ја претвори кариерата на голман во тренерска позиција со фокус на помагање на напаѓачите.
– Имав мала критика од (тренерот на голманите на Ипсвич) Рене Гилмартин, кој вели дека преминав на темната страна – вели Грант.
Колку подолго зборуваме, толку повеќе има смисла неговиот пат во кариерата. Кој подобро да им даде на напаѓачите клучна предност од некој чија кариера е помината обидувајќи се да ги запре?
– На 20-те години додека бев на голот и примив толку многу голови можам да се сетам многу сликовито. Тие се врежани во мојот ум и психа. Го користам тоа за да им помогнам на центарфорите, за такви ситуации што ниту еден голман не би ги сакал – рече тој.
И тоа функционира, сезонава Барнли е единствената екипа во Англија што постигнала повеќе голови од Ипсвич.
При завршувањето на тренингот тој им кажува на своите играчи со што најмалку би сакал да се соочи во конкретни моменти. Ова се строго чувани тајни, како на пример дека голманите во движење кога играчот има шанса за шут се загрижени за силен, ран удар кон својата далечна статива.
– Зборуваме за шаблоните на стапалата, колку брзо можеме да ги шутираме, да пристигнеме до топката што е можно побрзо, да ги скратиме чекорите. Ми се допаѓа кога нашите напаѓачи им диктираат на голманите. Уживам кога ние го водиме танцот. Ако се сетам на себе меѓу стативите, веројатно тоа беше местото каде што се чувствував најранливо, кога напаѓачот имаше вистинска јасност за тоа што се обидуваше да го постигне и можеше да го направи тоа со брзина и со прецизност – рече Грант.
Грант го помина поголемиот дел од својата играчка кариера во дивизијата Чемпионшип, почнувајќи со Дерби каунти, пред да замине во Шефилд венсдеј и Барнли. Во својот втор престој во Дерби, тогашниот менаџер Најџел Пирсон му кажа на Грант дека му ги одзема бројот 1 и статусот како прв чувар на мрежата. Таа сезона заврши со наградата за играч на годината во Стоук во Премиер-лигата, пред неверојатниот четиригодишен престој како трет голман во неговиот клуб од детството, Манчестер јунајтед.
Неговата скромна цел беше да заигра и неговото деби дојде на стадионот „Олд трафорд“ против клубот од детството, Дерби, во Лига-купот, заменувајќи го повредениот Серхио Ромеро.
– Навивачите на Дерби го пееја моето име додека влегував во игра, а навивачите на Манчестер јунајтед веројатно мислеа кој е овој – вели Грант.
Следуваше настап во Лига Европа и Грант уште го држи рекордот како најстар играч што имал европско деби за Јунајтед. Жозе Мурињо потпиша со него, а Грант има само среќни спомени.
Грант чувствува дека неговата улога на резервен голман го направила подобар тренер.
– Не би сакал ништо повеќе отколку повеќе голмани навистина да видат дека имаат многу да понудат на фудбалот. Особините што ги имате во таа позиција се тенденција да бидете добар лидер и гласен. Поминувате многу време навистина размислувајќи за играта, знам дека непрестано размислував за тоа. Се сеќавам дека Пеп Гвардиола зборуваше за Микел Артета кога работеше заедно со него во Сити и рече дека „Микел ќе биде прекрасен тренер и одличен менаџер бидејќи играше во центарот на теренот“. Всушност си помислив дека нашата позиција на теренот е малку подобра. Мислам дека имаме исто толку добар, ако не и подобар поглед – вели Грант. Н.М.
