Здрава храна
Лековитата моќ на дудинката е тајна што ја знаеле нашите баби. Овој симбол на семејните дворови не е само сладок плод туку и моќна домашна аптека за грлото, варењето и регулирањето на шеќерот. Во нашите предели некогаш не можеше да се замисли уличка или двор без дудинка. Слатките плодови на ова дрво ги обожаваа децата, а од паднатите плодови им остануваа на босите стапала црвени или црни траги. Сликата денес е различна, дрвјата со дудинки ги има сѐ помалку, а расадници на млади дудинки речиси и нема.
Дудинката се дели на два главни вида, а и двата се лековити и корисни. Белата е дрво што расте до 20 метри и има тркалезна круна. Неговите лисја се широко јајцевидни, а плодовите се движат од бела, преку розова до црвено-црна боја. Потекнува од Кина, каде што главно се одгледувало поради лисјата со кои се хранат свилените буби. Црната дудинка е исто така високо дрво, но неговата круна е поширока, а лисјата груби и влакнести. Плодовите на црната дудинка се сочни, темни црно-виолетови, речиси двојно поголеми од оние на белата и со посладок вкус. Потекнува од Иран и Авганистан. Како лековити суровини се користат плодот, кората со коренот и листот на црната дудинка. Плодот на дудинката е исклучително богат и содржи само 9 отсто шеќер, органски киселини, пектин, витамини и минерални соли.
