Група луѓе од уметничките кругови во Њујорк се ангажирани под мотото „Ослободете ја Ана Делви“ за да ѝ помогнат да добие нова виза и да остане во обожаваниот Њујорк
Светот е сцена
Додека е во затвор во близината на Њујорк, Ана Сорокин или Ана Делви чека судска одлука за жалбата против пресудата за нејзино протерување од САД и забраната за враќање во земјата. Во меѓувреме, пишува белешки за мемоарите што ќе ги објави. Група луѓе од уметничките кругови во Њујорк се ангажирани под мотото „Ослободете ја Ана Делви“ за да ѝ помогнат да добие нова виза и да остане во обожаваниот Њујорк.
Инаку, Ана, германска државјанка, не е сиромашна уметница со огромен талент, ниту пак жртва на несреќни околности и ригидно законодавство за имиграција. Таа е измамничка за која „Нетфликс“ ја сними мини-серијата „Инвентинг Ана“. Сега 31-годишна жена, со њујоршки крем и стил успеа да измами разни хотели, компании, ликови, за повеќе од 275.000 долари. За малку ќе успееше да земе и заем од 33 милиони долари за да основа елитен уметнички клуб.
Кога приказната пукна и Ана беше откриена, таа беше четири години (од 12 пресудени) во затвор. Беше пуштена на условна слобода во 2021 година, поради добро однесување.
Наместо да се обиде да ги избегне камерите и медиумите, додека траеше судењето таа комплетно го привлече вниманието на јавноста, почна да дава интервјуа на сите страни, потпишувајќи договор за серијата со „Нетфликс“. Со тие пари, пак, ги плати казните и ги врати долговите. Сакаше да лансира линија облека, „долна облека во затворски стил“, дури се зборуваше за дизајнирање маици со кју-ар код од нејзината банка и сметка на која луѓето можеа да донираат десетици илјади долари за Ана.
Доаѓала кај службеникот за условна казна во Бруклин во лимузина и дизајнерски комбинации и живеела во убав хотел. Изјавила дека е сопственичка на Њујорк. Таа ги налути обвинителите со нејзините изјави за правниот систем, повредувајќи многу моќни луѓе. Материјалната штета беше значително помала од ранетото его на високото општество. Службата за имиграција ја вратила во затвор бидејќи било утврдено дека ѝ истекла визата со која влегла во САД. Затоа е невообичаено некој да застане на страната на Ана Сорокин / Делви.
Изложбата „Слободна Ана Делви“ е отворена неодамна. Очигледно, темата е Ана, а меѓу делата, кои, наводно, уште првиот ден се продале, се и пет затворски цртежи нацртани од самата Ана. Сè изгледа како одлична мултимедијална изложба и совршен материјал за втората сезона од серијата.
Кустоси на изложбата се Алфред Мартинез и Џил Морисон, познати имиња на тамошната сцена. Мартинез, инаку, помина неколку години во затвор во текот на раните 2000-ти за измама. Го фалсификуваше Жан-Мишел Баскијат. Во затворот, тој се откажа од копирањето и продолжи да се занимава со „својата уметност“, а еден од неговите цртежи создадени зад решетки исто така беше купен од Музејот за современа уметност во Њујорк. Тој е сеприсутен на њујоршката уметничка сцена, курирал десетици изложби и успешно поврзува големи имиња и млади надежи.
Кога Ана излезе од затвор во февруари 2021 година, тој знаел дека мора да работи со неа. Ги видел цртежите создадени додека уметницата на измамата била во затворите Рикерс и Албион, кои подоцна ги објавила на социјалните мрежи и заклучил дека таа е перспективна уметница. Тие отидоа чекор понатаму и Мартинез префрли пет нејзини цртежи во голем формат.
– Ако некој веќе ја копира нејзината уметност, добро е што тоа го направил некој што го копирал Баскијат – рече Мартинез.
Работите се искомплицираа кога Ана се врати во затвор, но проектот „Ослободете ја Ана Делви“ успеа и во галерија на Менхетн беше организирана поп-ап изложба. Според изворите, се наоѓа многу блиску до хотелот каде што Сорокин се преправала како богата наследничка и светска патничка, успешна интелектуалка, мамејќи американски богаташи и културни дејци. На отворањето на изложбата се собраа околу 150 луѓе, а меѓу нив, како што пишуваа американските медиуми, беше и Тод Сподек, адвокатот што ја бранеше Ана. Пред ова судење, Тод имал уште 11 случаи, но ниту еден не им паднал во око на медиумите, не им биле привлечни. Тој изјавил дека се надева дека изложбата ќе покаже дека неговиот поранешен клиент може да се промени и да напредува.
– Сè што сакам е судењето и проблемите од минатото да бидат само едно од поглавјата во огромната книга на нејзиниот живот. Време е да продолжиме понатаму. Таа создаде голема уметност. Луѓето се овде за да ја поддржат и тоа е она што е важно – изјави Тод.
Изложбата, покрај изразувањето поддршка, има уште една важна, всушност, поважна цел. Како уметница, Сорокин може да аплицира за „креативна виза“, која ѝ дозволува да остане во Соединетите Американски Држави.
– Пресреќна сум и благодарна за поддршката што ја добивам од младите уметници и воопшто од уметничкиот свет. Се надевам дека ќе бидам лично присутна на следната изложба – изјавила Ана.
Морисон, позната по нејзините уметнички инсталации што ги критикуваат моќните луѓе, кои успешно ја избегнуваат раката на правдата, иако извршиле многу поголеми злосторства од Ана Сорокин, верува дека Ана ги исплатила своите долгови, ги вратила парите, поминала време во затвор и дека заслужува да биде слободна. Некои медиуми пишуваат дека поп-ап изложбата „Ослободете ја Ана Делви“ е само најава за нејзината прва самостојна изложба, која треба да опфати околу 20 цртежи со молив.
