Драги деца, во „Колибри“ објавуваме делови од книгата „Бонтон за деца“ на познатиот македонски писател Наум Попески, кој исто така неколку години бил и уредник на нашето гласило за најмладите читатели. Бидејќи убавото воспитување се учи од мали нозе, се надеваме дека со овие едукативни текстови ќе ви помогнеме да израснете во умни и внимателни момчиња и девојчиња
„Бонтон за деца“ од Наум Попески (3)
Убавината на убавото однесување не е само во тоа некој добро да учи, да поздравува и да отпоздравува. Детето како иден возрасен човек треба да се изградува во комплетна личност, со разновидни интересирања, со чувство кон сите луѓе, без разлика на нивната вера, боја, раса или национална припадност. Треба да биде хумано и со чувство за љубов кон својот народ, својата татковина и кон сите луѓе воопшто. Значи, не само дете, туку да биде убаво воспитана личност, човек.
Кога ќе видите такво дете, веднаш ќе речете: Ова е убаво воспитано дете!
* * *
Подгответе некоја игра каде што ќе има деца од разни бои и раси, а вам тоа нема да ви пречи, туку еднакво ќе си играте меѓу себе. Се разбира играта ќе ја подготвите со помош на вашата наставничка.
За авторот
Наум Попески е роден во Вевчани, во 1947 година. Основно образование завршил во родното место, а гимназија во Струга. Студирал на Филолошкиот факултет во Скопје (тогаш Филозофски факултет), на групата Книжевност и македонски јазик. Од 1971 година работи како новинар во редакцијата на весникот, „Нова Македонија“, каде што го помина целиот работен век. Неколку години го уредуваше и додатокот за деца „Колибри“.
Автор е на петнаесетина книги за деца, меѓу кои: „Ајде да растеме“, објавена како дебитантска книга во „Детска радост“ – Скопје, во 1982 година, а потоа од перото на Попески следуваа и книгите „Детелинка со четири листа“, „Изворчиња – поточиња“, „Една грешка – мака тешка“, „Еколошки бонтон“, „Спомени во слики“, „Летни, светни, светулке“…
Неговиот „Бонтон за деца“, книга за убаво однесување, е прво објавено дело од ваков вид на македонски јазик, а досега доживеа повеќе изданија.
Наум Попески е застапен во читанките по македонски јазик, а негови стихови има во многу антологии и зборници на литературата за деца. Преведуван е и на повеќе европски јазици, во книги и списанија за деца. Член е на Друштвото на писателите на Македонија.
