Традиционално утврдените улоги ги прават луѓето поранливи на екстремни временски услови
Научниците велат дека поекстремните временски услови се особено штетни за жените и ја влошуваат постојната нееднаквост, пишува Аџит Ниранџан за „Дојче веле“
Заедничко за сите екстремни временски непогоди, како сушите, поплавите и пожарите, не е само тоа што се влошуваат од согорувањето на фосилните горива туку тоа што ги погодуваат мажите и жените на многу различни начини. Во Бангладеш, девет пати повеќе жени отколку мажи загинаа кога циклонот Горки го зафати крајбрежјето во 1991 година. Во Австралија, двојно повеќе жени од мажите сакаа да се евакуираат на безбедно за време на разорните пожари во 2009 година. Во Кенија, жените беа последни во редот за да добијат храна за време на сушата во 2016 година, која остави гладни повеќе од два милиони луѓе. Со децении политичарите ги игнорираа предупредувањата дека традиционално утврдените родови улоги ги прават луѓето поранливи на екстремни временски услови. Сега, со ефектите од климатските промени што им се чукаат на вратите, тие се принудени да размислат како да се приспособат на начини што ќе ги намалат тие нееднаквости наместо да ги зголемуваат.
Луѓето што се маргинализирани од општеството поради нивниот пол помалку можат да се приспособат на климатските промени или да закрепнат од нивното влијание, заклучија научниците во широкиот преглед на академската литература за влијанијата врз климата и адаптацијата. Жените генерално имаат помалку пари, помалку можности и немаат приоритет од политичарите, кои се несразмерно мажи. Тоа, пак, ги остава поранливи на понатамошна дискриминација. За време на суши, жените и девојчињата се принудени долго да пешачат, а често и ноќе за да донесат вода. Тоа ги става на поголем ризик од сексуално насилство. Подолгите растојанија, исто така, значат дека тие поретко се движат што го намалува количеството вода достапно за семејството и притоа останува уште помалку за жените во културите каде што мажите први јадат и пијат. Овој проблем може да ја отежни менструалната хигиена и да ги спречи девојчињата да одат на училиште.
Премногу вода може да има слични погубни ефекти. Поплавите што ги принудуваат луѓето да го променат живеалиштето или ги уништуваат санитарните јазли и предизвикуваат дефицит на санитарни производи, носат дополнителен товар во земјите. Сепак, не сите ефекти на екстремните временски услови исто влијаат врз половите. Во САД, мажите имаат двојно поголема веројатност да умрат од болести поврзани со високи температури отколку жените, бидејќи тие имаат поголема веројатност да работат надвор на фарми и на градилишта. За време на смртоносните пожари во Австралија, мажите претежно останаа да ги бранат домовите, а како резултат на тоа загинаа во поголем број. Според студијата објавена во списанието „Џиографикал рисрч“ во 2016 година, мажите поретко ги слушале советите на пријателите и семејството да заминат на безбедно.
Владите ветија родово одговорна адаптација
Во 2015 година, светските лидери го потпишаа Парискиот климатски договор за да се обидат да го ограничат глобалното затоплување на 1,5 степен Целзиусов над прединдустриските температури. Тие признаа дека треба да следат „родово одговорен“ пристап кога станува збор за приспособување на климатските промени, водени од најдобрата достапна наука. Политичарите би можеле да го направат тоа со трансформирање на системите што ја одржуваат нееднаквоста и повторно да преговараат за нееднаквата динамика на моќ, утврди Меѓувладиниот панел за климатски промени (ИПЦЦ) во својот извештај за адаптација. Тоа може да значи еднакво споделување на богатството и ресурсите и обезбедување правична застапеност во одлучувањето за животната средина. Авторите на извештајот наведоа дека до денес, емпириските докази за таквата трансформациска промена се ретки. Наместо тоа, научниците пронајдоа примери само за постепени промени. Тие вклучуваат зголемување на уделот на жените во конкретни проекти за адаптација и посветување посебно внимание на родовите во националните климатски политики.
Жените помалку загадуваат од мажите
Поправедната застапеност, исто така, може да ги забави климатските промени. Жените имаат помали емисии од мажите затоа што имаат тенденција да јадат помалку месо и помалку да возат, се вели во посебниот извештај на ИПЦЦ за климатските решенија што беше објавен во април. Минал Патак, научничка од ИПЦЦ, забележува дека жените имаат тенденција да прават поеколошки разумни избори. Таа смета дека тоа делумно се должи на нивниот начин на живот.
Научниците пронајдоа и докази дека жените повеќе придонесуваат за структурните промени. Од Шведска до Уганда, Индија до Филипини, протестните движења за борба против климатските промени „Петоците се за иднината“ беа несразмерно предводени од жени и девојки. Загадувањето со јаглерод диоксид е помало во земјите каде што жените имаат поголем политички глас, дури и по контролата на приходите и другите фактори, покажа извештајот на ИПЦЦ. Во општеството, жените им даваат приоритет на климатските промени во начинот на кој гласаат, работат, купуваат и се вклучуваат во нивните заедници, се вели во извештајот. Поголема е веројатноста од мажите да станат еколошки активисти и помали се шансите да ги негираат климатските промени.
