Каква е состојбата на патиштата на Стариот Континент
Околу 12.987 бизнисмени од 139 економии во светот беа анкетирани за квалитетот, обемот и состојбата на патиштата во нивните земји. Така, во Европа, истражувањето откри дека граѓаните на Западна Европа имаат или сметаат дека имаат подобра патна инфраструктура на континентот, пишува Камила Бело за „Еуроњуз“
Дури и како земја што може да се пофали со можеби најдобрата велосипедска инфраструктура во светот, една европска земја се издвојува во светот и по тоа што има некои од најдобрите патишта и за возила. Холандија го зазеде највисокото европско место во Извештајот за глобална конкурентност за 2019 година, објавен од Светскиот економски форум, последната суштинска студија направена за квалитетот на патиштата пред ударот на пандемијата на ковид-19.
Околу 12.987 бизнисмени од 139 економии во светот беа анкетирани за квалитетот, обемот и состојбата на патиштата во нивните земји. Испитаниците мораа да ја позиционираат патната инфраструктура на нивните земји на скала од еден до седум, при што со еден се оценува исклучително лоша и меѓу најлошите во светот, а со седум се оценува исклучително добра и меѓу најдобрите. Во Европа, истражувањето откри дека граѓаните на Западна Европа имаат или сметаат дека имаат подобра патна инфраструктура на континентот. Граѓаните на Источна Европа, од друга страна, имаат севкупна мрачна слика за квалитетот на патиштата во нивните земји.
Холандија (6,4) го зазема првото место по квалитетот на патиштата во Европа, а само Сингапур (6,5) ја надминува на глобално ниво. Понатаму следуваат Швајцарија (6,3), која е исто така трета во светот, Австрија (6,0), Португалија (6), Шпанија ( 5,7) и Хрватска (5,6). На глобално ниво, четвртото и петтото место за подобар квалитет на патната инфраструктура им припадна на Хонгконг (6,1) и Јапонија (6,1). Најдолната петорка на листата во Европа ја исполнуваат Малта (3,3), 106-та на глобалната листа од 141 земја, Украина (3,0) на 114-то, Романија (3,0) на 119-то, Босна и Херцеговина (2,8) на 121-то место во светот, како и Молдавија (2,6) на 127-мо место. Најлошите патишта во светот, според анкетираните бизнисмени од Светскиот економски форум, се низ Африка, Карибите и Блискиот Исток, како во Чад (1,9), потоа Мавританија (2,0), Мадагаскар (2,0), Јемен ( 2,1), Хаити (2,1) и ДР Конго (2,1).
Квалитет на патиштата во Европа
Истражувањето за квалитетот на патиштата на Стариот Континент резултира и со неколку изненадувања. Белгија (4,4) заостанува по квалитетот на патиштата зад повеќето соседи во Западна Европа. Истото тоа важи и за Италија (4,4) Ирска (4,4) и Исланд (4,1). На источната страна на Европа, Грција се издвојува со оценка 4,6, далеку од првото место, но е подобра од соседните земји Бугарија (3,4), Македонија (3,4) и Албанија (3,9). Друг позитивен резултат е Турција (5,0), која постигна подобри резултати од некои западни и нордиски земји, како Норвешка (4,5) и Велика Британија (4,9).
Како е оценета безбедноста на патиштата
Во 2020 година, сообраќајните несреќи во земјите-членки на Европската Унија (ЕУ) зедоа околу 18.800 животи, а повеќе од 0,5 милиони луѓе беа повредени. Бројките можеби се високи, но Европа останува далеку најбезбедниот регион во светот кога станува збор за безбедноста на патиштата.
Сепак, постојат важни разлики меѓу земјите. Треба да се забележи дека некои од земјите што се на врвот на листата со најмал број жртви на милион жители, како што се Холандија, Швајцарија, Норвешка, Данска и Финска, исто така се високорангирани во истражувањето за квалитетот на патната инфраструктура на Светскиот економски форум. Од друга страна, Хрватска, која е една од врвните земји по квалитет на патната инфраструктура, е високорангирана на листата на жртви, а исто така и Португалија.
На глобално ниво во Европа, патиштата стануваат побезбедни. Тоа може да се види со падот на бројот на сообраќајни несреќи што резултирале со повреди или смрт од 2010 до 2020 година. Земјите како Норвешка, на пример, го намалија бројот на фатални несреќи за 46 отсто во последната деценија, од 43 случаи годишно во 2010 година на дури 18 во 2020 година. Италија, исто така, има добар резултат, со тоа што го намали бројот за 44 отсто, од 70 сообраќајни несреќи што резултираа со повреди или смрт на 40 случаи. Треба да се забележи дека и Хрватска оствари пад од 42 отсто, од 99 на 58 смртни случаи во сообраќајни несреќи. Во ЕУ, бројот на сериозни сообраќајни несреќи е намален за 22 отсто, од 67 на 42 случаи.
Што се однесува до иднината, ЕУ воведе нова рамка на политиката за безбедност на патиштата за намалување на бројот на смртни случаи до 2030 година за 50 отсто, а исто така, за првпат, од сериозни повреди.
