Меѓународни гостувања и соработки
Во местото Дољевац, крај Ниш во соседна Србија, на 19 и 20 мај се одржаа дваесет и вторите Средби на просветните работници што создаваат книжевност за деца. Манифестацијата е во организација на културно-просветното друштво „Петар Кочиќ-Троречје“, чиј претседател е истакнатиот српски поет за деца и професор по српски јазик Власта Н. Цениќ, кој беше домаќин на манифестацијата.
По покана од организаторот, годинава Македонија беше претставена од м-р Љупка Стојменова, професорка по македонски јазик од Кочани, писателот Горјан Петревски, поетот Филип Димкоски и м-р Коце Стојменов, директор на кочанската библиотека „Искра“.
Богата програма
Во богатата и совршено осмислена дводневна програма, претставниците на нашата држава имаа два поетски настапи во Јавната библиотека во Дољевац и средба со учениците од ОУ „Вук Караџиќ“.
Општина Дољевац, иако мала општина по бројот на жители, има многу богата културно-просветна традиција. Како доказ, само ќе наведеме дека во досегашната историја, оваа општина изнедрила дури сто и четиринаесет учители. Денешните генерации просветни работници се горди на овој факт и со несмален интензитет ја креираат и реализираат воспитно-образовната мисија, сфаќајќи го учителствувањето не како професија, туку како мисија.
Токму Власта Цениќ и неговите колеги професори Даниела Стојановиќ, Тања Стојановиќ, Деса Ранѓеловиќ, Сузана Периќ и Дејан Митровиќ се креатори на многу возбудливи проекти, сценски поставки со стихувани сценарија, поезија, драма, музика, богата костимографија и сценографија. Така и во овие два дена, овој необичен и неповторлив колектив ги поведе публиката и гостите во царството на сништата, зборовите и стиховите, каде што кралот нареди да се рецитира, да се пее, секој да се смее и секој среќно да живее.
На прекрасен начин беше претставен и богатиот фолклор на Србија и на Македонија, а се потенцираше и богатството на дијалектите што го поседуваат двата јазика. Па така, на еден од настаните беа претставени познатата песна на Власта Н. Цениќ, напишана на призренско-тимочки дијалект, и нејзиниот препев на македонски јазик, односно на прилепски дијалект, направен од поетот Филип Димкоски.
На манифестацијата покрај досега споменатите учесници, свои претставувања имаа истакнатиот поет и новинар Бошко Ломовиќ, современата популарна поетеса и писателка Виолета Јовиќ, поетот и учител Горан Јоксимовиќ, младите и веќе афирмирани поетски пера Стеван Милошевиќ и Александар Јањушевиќ, писателките и наставнички Лилјана Соколовиќ и Јелена Бабиќ, талентираните ученици Ања Ѓорѓевич, Василије Живковиќ и учениците од ОУ „Вук Караџиќ“.
Договор за продлабочување на пријателството
Се одржа и средба на гостите од Македонија, со директорот на Јавната библиотека во Дољевац, Боги Митиќ, каде што беше разговарано за продолжување и продлабочување на културно-уметничките врски меѓу Кочани, Прилеп и Дољевац, при што беа подарени голем број книги за историјата и традицијата на Кочани и за кочанскиот ориз, репрезентативни книги за прилепскиот тутун, како и уметничка литература од Друштвото за наука и уметност на Прилеп и Клубот на литературни творци од Прилеп.
Она што се зборуваше и договараше веќе наеднаш премина во фаза на реализација, па така, меѓународната манифестација за поттикнување на читањето кај децата „Читалчиња“ во Алексинац и годинава ќе има македонски претставници предводени од м-р Љупка Стојменова, а наскоро од печат ќе излезе и препев од српски на македонски на книгата „Ѕвездена лектира“ од поетот Власта Цениќ. Книгата ја препеа поетот Филип Димкоски, рецензент е Горјан Петревски, лектурата ја направи поетесата Виолета Танчева Златева, додека илустрациите и кориците се на академскиот сликар Владимир Здравески, а во издание на здружението „Стари поток“ од Кочани.
Ф.Д.
