По повод 8 Март, Денот на жената, во организација на „Охридско лето“ ќе се одржи концерт на популарното трио „Џентлмен“, музички состав од тројца професионални оперски пејачи, Дејан Стоев – тенор, Кристијан Антовски – баритон и Јане Дунимаглоски – тенор, кои имаат посебна специфика во својата изведба како модерна уметничко-сценска атракција.
– Концертот, кој ќе се одржи на 7 март, во црквата „Света Софија“ во Охрид, со почеток од 19 часот, ќе им биде посветен на припадничките на понежниот пол – велат организаторите.
По примерот на светските поп-класични состави, триото „Џентлмен“ се труди тој жанр на пеење за првпат да го презентира и на нашите простори. На нивниот репертоар, освен класичните композиции, се наоѓаат и најголемите светски поп-хитови изведени во поп-класичен манир, наполитански канцони, шпански песни и, секако, македонското творештво.
– Она што претходно го најавивме, дека „Охридско лето“ нема да биде само во рамките на 40 дена, сега го реализираме. По успешниот новогодишен концерт, сега реализираме осмомартовски, како подарок за сите припаднички на понежниот пол. Сакаме врвната култура да живее преку цела година, со што од една страна го афирмираме фестивалот, а од друга страна и Охрид како град, но и државата во целина. Нудиме квалитет, а тоа го препознава нашата верна публика – вели директорката на „Охридско лето“, Наташа Поповиќ.
Триото „Џентлмен“ има настапувано низ целата земја со свои целовечерни концерти, тие се дел и од големи манифестации во нашата држава, како и надвор од неа. Нивните настапи се познати по тоа што секогаш нудат нешто ново, нешто невидено на нашите простори. Тие се различни и по тоа што прават спој на операта и оперското пеење со различни жанрови, како поп, латино, џез, рок-композиции, и сето тоа во еден нов и специфичен звук, тризвук интрепетиран од тројца оперски пејачи.
