Нега и убавина
Докажано е дека билките можат добро да влијаат на продуктивноста на луѓето, а има и такви со чија помош полесно заспивате и имате поквалитетен сон.
Прва на листата е змиската билка, позната како „јазикот на свекрвата“. Додека повеќето саксиски растенија го претвораат јаглеродниот диоксид во кислород во текот на денот, таа го прави тоа и ноќе, што ќе ви помогне да се смирите и полесно да потонете во сон.
Фикусот исто така може да биде корисен, бидејќи има големи листови, со чија помош „ги впива“ токсините и така го прочистува загадениот воздух.
Секако, лавандата е незаобиколна, бидејќи нејзиниот мирис опушта. Според порталот „Кантри ливинг“, ќе ви го смири нервниот систем и полесно ќе заспиете.
Лилјанот го зголемува количеството на влага во воздухот, што исто така го олеснува спиењето во текот на потоплите месеци. Сепак, бидете претпазливи доколку имате домашно милениче. Особено е штетен за кучињата и мачките ако го проголтаат. Треба да го чувате и подалеку од дофат на децата.
Иако алое вера веројатно е најпозната по тоа што помага кај болните изгореници од сонце, таа е и одличен избор за квалитетен сон. Ослободува кислород исклучиво ноќе и така го прочистува воздухот додека одморате.
