Кога дојдов, и ние не очекувавме. Знаете, повеќе бевме на надолна патека откако се пензионира Сампрас. Што ќе биде следно, нели? Па, дојдов, потоа дојде Рафа, а потоа беше Новак, а потоа и Енди, сите заедно. Одеднаш се појави овој прекрасен микс, сите победуваме повеќе од десет години. Затоа, мислам дека, и за гледачите, беше задоволство да се гледа и сигурен сум дека некои гледачи ќе бидат тажни што заминувам, се разбира, но секогаш ќе има прекрасни нови луѓе. Мислам дека нашата турнеја овозможува неверојатни приказни, па затоа знам дека играта е многу безбедна и сигурен сум дека ќе има нови неверојатни суперѕвезди, рече Федерер
ТЕНИС
Роже Федерер вели дека неговата одлука да се пензионира од тенисот дошла откако „престанал да верува“ дека може да продолжи да игра поради повреди, пишува „Би-би-си“. Освојувачот на 20 гранслем-титули се повлекува од спортот по Лејвер-купот, кој почнува утре, во Лондон. Швајцарецот (41) нема играно од гранслем-турнирот Вимблдон во 2021 година, по што ја имаше третата операција на коленото.
– Претходните три години беа, во најмала рака, тешки. Знаев дека сум на многу тенок мраз минатата година, откако играв на Вимблдон. Се обидов да се вратам, но имаше ограничување на тоа што можам да направам. И престанав да верувам во тоа, да бидам искрен – изјави тој за „Би-би-си“.
Федерер рече дека имал скенирање пред неколку месеци и дека „не е она на што се надевав“, додавајќи: „Многу брзо сфативме дека тоа е тоа“.
– Тогаш се постави прашањето: како објавувате и кога објавувате? Тогаш стана реалност. Беше во ред, но стресно – вели Федерер.
Федерер вели дека никогаш не се занимавал со тенис замислувајќи дека ќе има таков успех. Тој помина 310 недели како светски рекет број еден, вклучувајќи и рекордни 237 недели по ред, и освои 103 АТП-титули во сингл.
– Мислам дека никој не расте и мисли дека ќе победи толку многу. Знаете, среќен сте со освојување на Вимблдон, што е веќе лудо, или да станете број еден, да бидете најдобри. Но тогаш не мислите колку недели, само медиумите и навивачите зборуваат за соборување рекорди. Прво се надевав дека еден ден ќе бидам на турнеја, потоа да се влезе меѓу врвните 100 е огромна работа. Тоа беше апсолутен сон што го сонував многу долго. И јас го знам тоа, и затоа сум среќен и што заминувам – вели Федерер.
Федерер играше во ера кога тој, Рафаел Надал, Новак Ѓоковиќ и Енди Мареј беа доминантни на големите турнири. Четворицата ќе бидат во ист тим на Лејвер-купот, на кој тимот Европа (уште и Каспер Руд и Стефанос Циципас) ќе се соочи со тимот Свет, во последното професионално натпреварување на Швајцарецот. Тој е среќен што неговата ера ги одушеви тениските гледачи, но не верува дека треба да се грижат за иднината на спортот.
– Кога дојдов, и ние не очекувавме. Знаете, бевме повеќе на надолна патека откако се пензионира Пит Сампрас. Што ќе биде следно, нели? Па, дојдов, потоа дојде Рафа, а потоа беше Новак, а потоа и Енди, сите заедно. Одеднаш се појави овој прекрасен микс, сите победуваме повеќе од десет години, сите исти турнири, речиси никој друг не можеше да освои ништо друго. Тоа беше како заклучување на големите турнири. Затоа, мислам дека, исто така, и за гледачите, беше задоволство да се гледа и сигурен сум дека некои гледачи ќе бидат тажни што заминувам, се разбира, но секогаш ќе има прекрасни нови луѓе. Мислам дека нашата турнеја овозможува неверојатни приказни, па затоа знам дека играта е многу безбедна и сигурен сум дека ќе има нови неверојатни суперѕвезди – рече Федерер.
