Со целиот предновогодишен ангажман, моја и желба на учениците беше да
создадеме убави чувства и позитивни мисли со кои децата ќе посакаат, барем привремено, да ги замолчат мобилните апликации. Наедно, така ќе ја зголемат својата самодоверба и повеќе и поквалитетно ќе другаруваат, вели Маја Трајковиќ
Традиционално во училишната библиотека при ООУ,,Невена Георгиева-Дуња“, во скопската општина Кисела Вода
Училишната библиотека при ООУ,,Невена Георгиева-Дуња“, во скопската општина Кисела Вода, е место каде што често се реализираат интерактивни и едукативни активности што ги поврзуваат културата и образованието. Всушност, училишната библиотекарка и наставничка м-р Маја Трајковиќ смета дека не постои образование без култура, но нема ниту култура без образование и затоа се обидува, освен во училишната библиотека, и во училниците да ги реализира работилниците посветени за поттик кон читањето со помалите деца.
Таа тврди дека од најрана возраст, додека е нагласена детската љубопитност, треба да се наметне инспирацијата за читање книги. Според Трајковиќ, се учи и при посета на галерии, музеи и јавни библиотеки, како на пример ден поминат во националната галерија „Чифте-амам“ во старата скопска чаршија или, пак, во градската библиотека „Браќа Миладиновци“, каде што учениците учат за древните мудрости на најстарите цивилизации, но и за ликовното и книжевно творештво на македонските дејци. Тие ги пренесуваат нашите историски и цивилизациски придобивки од минатото во сегашноста, со што се чува нашата традиција.
Практична настава во културни установи
– Сите овие великани нè учат дека пред да го запознаеме светот треба да се спознаеме самите себеси, оти во спротивно светот нема да нѐ признае и да нѐ препознае. И навистина, ако сакаме читатели и посетители на културни институции, тогаш неизбежни се постојани работилници во училниците, како и посети на културни настани, изложби и проекти што се случуваат низ градот. Концептот на преземените воннаставни активности од училишната библиотека помага во практично остварување на наставата кај децата и затоа сите овие набројани активности се вметнуваат и ги поддржуваат лекциите за време на часовите. Интерактивните работилници поврзани со читање се состојат од игровни активности што имаат јасни видици за внимателно слушање, моќна концентрација и библиотерапевтско дејство на книгата. Исто така, сите овие критериуми се задолжени за грижата за менталното здравје кај децата. За да се насочат од најрана возраст на вистински пат, на децата им е потребен убав почеток. Потребно е светот да го доживеат со убави бои и токму затоа една од активностите на училишната библиотека е да објавува ликовни конкурси на кои им се подаруваат книги за раскажување приказни со нивни илустрации – вели Маја Трајковиќ.
Писателите – драги гости
Таа посочи дека исто така се важни посетите на писателите и поетите, кои меѓу учениците ги промовираат своите книги. Тој близок контакт со авторите за кои учат во читанките е мотивирачки за учениците.
– Децата сакаат да ги запознаат писателите, но исто така посакуваат пред нив да ја покажат и сопствената дарба за пишување. Тие со мала доза на креативна трема ги читаат своите песни, раскази и гатанки пред омилените автори и се пресреќни кога ќе добијат комплимент за напишаното. Неодамна гостинка во нашата библиотека беше авторката на збирката песни „Другарска азбука“, Снежана Петрова-Џамбазова, која другаруваше со првачињата.
Наш гостин беше и писателот Даниел Бибовски со својата книга „Архангел“, кој се спријатели со учениците од шестите, седмите и осмите одделенија, на кои им ја претстави содржината на неговото дело. Меѓу другото, се разговараше за вечната борба меѓу доброто и злото.
По покана од издавачката куќа „Антолог“ во Младинскиот културен центар се одржа фестивалот за европска литература „Букстар“ (Book star), во чии рамки беа реализирани книжевна работилница и средба со европски познат писател.
Формирањето вики-клуб како дел од образовната програма ги мотивираше децата да истражуваат и да пишуваат статии на теми што се привлечни за нив, со што тие се насочија и кон новинарската професија.
По посетата на детското катче во градската библиотека „Браќа Миладиновци“ во Скопје, во соработка со Александра Јуруковска и Андријана Апостоловска, во нашата училишна библиотека се вдомија 48 нови книги.
– Поуката од оваа посета е дека книгите, за разлика од технолошките изуми, не застаруваат и немаат рок на траење – нагласи Трајковиќ.
Националната галерија „Чифте-амам“, со едукаторката Маја Димитрова, низ ликовните и книжевните творби ги поттикнува децата да создаваат ликовни дела, по примерот на афирмираните ликовни дејци во нашата земја. Низ проектите „Шемов и јас“, „Зографски приказни“ и,,Правиме лампиони“ децата учеа за рачна изработка на хартија, дознаа за занаетот на Дичо Зографот и правеа украси за новогодишните празници.
Почитување на различните култури
Концептот на интеркултурализам со низата активности исто така е вклучен во наставата, а негова цел е развивање свест кај учениците за почитување на својата, но и на другите култури и традиции, меѓусебно запознавање, градење нови пријателства, како и потребата за развивање интеркултурна комуникација кај наставниците.
– И годинава, за да се почувствува магијата на новогодишните празници, децата од петите, шестите, седмите и осмите одделенија направија елка со книги. Како што велат, тие за нив се пријатели што им помагаат да стекнат нови искуства. Освен елката, тие ја накитија целата библиотека со лампиони од хартија, ги украсија полиците со светилки, испишаа новогодишни желби во божиќната кутија и направија Снешко од книги. Со целиот предновогодишен ангажман, моја и желба на учениците беше да создадеме убави чувства и позитивни мисли со кои децата ќе посакаат, барем привремено, да ги замолчат мобилните апликации. Наедно, така ќе ја зголемат својата самодоверба и повеќе и поквалитетно ќе другаруваат – посочи на крајот Маја Трајковиќ.
М.Т.
