Финансиските иновации поттикнати од финтек-компаниите во основа водат до подобри и поконкурентни финансиски услуги, а истовремено поттикнуваат поголема конкуренција и иновирање кај традиционалните финансиски институции – банките. Во изминативе години се забележува побрз раст на секторот финтек во Централна и Југоисточна Европа, иако тој значително заостанува зад оној во развиените економии, истакна гувернерката на Народната банка, д-р Анита Ангеловска-Бежоска, на 7-та средба на гувернерите од регионот, која се одржа изминатиот викенд во Савудрија, Хрватска.
Во центарот на вниманието на овој значаен настан, организиран од едно од најугледните и највлијателни деловни списанија на хрватскиот пазар, бизнис-неделникот „Лидер“, годинава беа предизвиците што ги носат технолошките иновации на полето на финансиските услуги – финтек. Во дискусиите имаше прашања за тоа како централните банки ги следат случувањата и трендовите во сферата на финтек и на што посветуваат најмногу внимание, може ли финтек да влијае врз монетарната политика и врз остварувањето на централнобанкарските цели, дали и какво влијание може да има врз финансиската стабилност во иднина. Ова се само дел од прашањата за кои, покрај гувернерката Ангеловска-Бежоска, дискутираа и гувернерите на централните банки на Словенија, Хрватска и Црна Гора, како и вицегувернерката на централната банка на Босна и Херцеговина. Свое излагање на средбата имаше и поранешната гувернерка на Централната банка на Израел, д-р Карнит Флуг.
На првата панел-дискусија на средбата, петтемина високи претставници на централните банки од регионот беа едногласни во оцената дека развојот на секторот финтек може да доведе до многубројни полезности за корисниците на финансиските услуги, но и дека е потребно соодветно следење од страна на регулаторите, заради навремено откривање и реагирање на потенцијалните ризици. Во своето излагање, гувернерката Ангеловска-Бежоска се осврна и на активностите на нашата централна банка поврзани со ова прашање, како што се новиот нацрт-закон за платежни услуги и платни системи, кој треба да овозможи поголема конкуренција во сегментот на платежните услуги, унапредувањето на платежната статистика заради подобро следење на иновациите во финансискиот сектор, како и подготвителните активности за формирање иновациски центар во рамките на Народната банка, кој ќе претставува платформа за дискусија за новите финансиски производи и услуги на финансиската индустрија.
Учесниците на оваа панел-дискусија говореа и за постојната регулаторна и институционална рамка во поглед на финтек, како и за различни аспекти на заштитата на потрошувачите. Истовремено, беа отворени и повеќе прашања за тоа како може финтек да влијае врз деловните банки сега и на долг рок. Во завршницата на панел-дискусијата беше подвлечено дека финансиските иновации не се новост, но дека е нов начинот на користење на технологијата во сферата на финансиите, со што значително се зголемува конкуренцијата во финансискиот сектор. Притоа беше нагласена потребата од поголеми вложувања во технологијата и од страна на деловните банки.
