Милениумците се првата генерација родители што пораснале во дигиталната доба – и тоа се забележува. Денешните родители имаат пристап до бесконечно повеќе информации отколку што имале нивните родители некогаш и се обврзани да следат различни стандарди.
Некои бебибумери можеби се потсмеваат на денешното таканаречено нежно родителство, но овие трендови се раѓаат од увидите во развојот на детето и влијанието на траумата од детството. Многу родители денес веруваат дека ако сакате да одгледувате љубезни и добро воспитани деца, треба да почнете со тоа што ќе се однесувате кон нив со љубезност и почит. Во исто време, променливиот економски пејзаж значи дека родителите се под поголем финансиски притисок – трошоците за грижа за децата само растат, при што семејствата сега просечно трошат 24 проценти од своите приходи за грижа за децата.
Со овој проблем, заедно со тоа што родителите работат подолго време и поминуваат повеќе време грижејќи се за своите деца, не е изненадувачки што менталното здравје на родителите трпи удар. Во август американскиот доктор Вивек Марти издаде советодавно предупредување за менталното здравје на родителите, наведувајќи „интензивирачка култура на споредба“ меѓу стресорите што ги оптоваруваат родителите, што ги наведува да пријавуваат значително повисоки нивоа на стрес отколку возрасните без деца, објавува „Јаху“.
Денешните родители сигурно бараат поддршка каде и да можат да ја најдат, преку интернет или во рамките на своите семејства. Честопати, бабите и дедовците сакаат да бидат од помош, но не можат да се справат со сите начини на кои родителството се променило откако тие ги одгледале своите деца. Ги прашавме родителите од милениумската генерација да ни кажат што сакаат нивните родители да разберат.
– Светот е поинакво место отколку кога бевме одгледани, па затоа родителството мора да биде поинакво. Менталниот напор е голем и обично двајцата родители мора да работат, па затоа традиционалниот семеен живот со кој повеќето од нас пораснаа е застарен. Коментарите од типот „кога бевте млади“, без разлика колку се добронамерни, ја зголемуваат родителската вина дека не сте достапни за вашето дете 100 отсто од времето како мајка или дека не сте во можност да издржувате сѐ финансиски како татко, а тоа навистина боли – рече Лесли Кокс.
Д-р Мона Амин, пак, објаснува дека милениумците се во поинаков свет кога станува збор за финансиската нестабилност, рамнотежата помеѓу работата и животот и за притисоците на социјалните мрежи. Навистина е потешко да се биде родител сега, особено кога станува збор за трошоците во споредба со тоа што беше порано, дури и кога ќе се земе предвид инфлацијата. Исто така, родителството е порамномерно распределено денес.
– Многу бумери се толку воодушевени од нашите партнери и колку тие се вклучени во воспитувањето на своите деца. Тие велат, боже, тој е најдобриот татко! И имам одличен сопруг, и тој е одличен татко, затоа што тој ги прави истите работи што ги правам и јас. И јас сум одлична мајка. Но, има толку многу пофалби за мажите, што мислам дека е смешно – рече Тејлор Волф.
И за менталното здравје се зборува отворено.
– Многу милениумци ги ставаат на прво место сопственото ментално здравје и емоционалната благосостојба на своите деца, прифаќајќи терапија, внимателност и отворена комуникација – додаде д-р Мона Амин.
Интересно е што во оваа анкета, милениумците посочија дека создавањето спомени, семејни патувања и чувства што ќе бидат трајно врежани во семејната рамка по патувањето се важни за нив. Нема грижа за заштеда или создавање каков било вид резерва. Новите генерации сега не се грижат за тоа.
Мариота Влаисављевиќ
(Политика.рс)
