За потребите на колумнава, одлучив да се држам за две теми што ги сметам за суштински изминатава недела: Европската Унија и нашиот правосуден систем. Потоа малку размислив. Вистината во суштина е контрадикторна, па заклучив: генијалната глупавост на Европската Унија ќе го однесе светот онаму каде што можеби заслужува, во Трета светска војна, а нашето судство, кое бара повисоки плати, а има совршена недоверба, сосема е независно од правдата додека ачик на сите шлапка во удобната плиткост на длабоката држава која ѝ ги одврза очите на Јустиција за да ѝ ги ископа. Тука престанав да размислувам и си реков, батали!
Затоа ќе пишувам за глупости. Пред појавата на социјалните мрежи имав далеку повисоко мислење за човештвото. Не дека носев којзнае колку љубов за расфрлање, на крајот на краиштата, како дете ме воспитуваа во духот на братството и единството, за веднаш потоа, во пубертет, да посведочам касапница среде која умре во агонија таа заблуда произведена од манипулација, но барем бев убеден дека човекот во суштина е добар, само злото има бесконечно многу замки за да го измами. Социјалните мрежи ме убедија во спротивното. Човекот во суштина е глуп, а злото речиси нема потреба којзнае колку да манипулира за да ја освои човечката плиткоумност, оти глупоста љуби да седи во неа, таму ѝ е удобно, а со малку етички и интелектуален фотошоп, тоа лесно се претставува за длабочина. Како што рече еден спореден лик во „Браќа Карамазови“, јас ги сакам сите луѓе одеднаш, ама одделно, индивидуално, не ги поднесувам.
Мрежите ми докажаа колку е нестварно силна божјата љубов спрема човекот. Па, Бог ни ги знае помислите што се раѓаат во срцата кои најчесто и не излегуваат на виделина. Но, она што се распостила по социјални мрежи, нека ми простат лингвистиката и граматиката, во форма на зборови што прават реченици, над кои блеска замислена неонска реклама што пропагира, „види колку сум паметен/паметна“ веднаш ме трансформира во одвратен циничен намќор, кој сака да го фати првиот вселенски брод што поминува во наша близина и да замине во неповрат некаде низ вселената.
Добра идеја, Русјаков! Вака одвратен се надеваме дека елиените ќе ти спроведат гадни експерименти.
Глупости! Зошто би вршеле експерименти на битие што ѝ припаѓа на глутница што се умислува покорисна од улично куче што си ја лиже повраќаницата? Кучето барем се труди брзо да го врати во себе тоа што му излегува од устата, човекот своите блуеници вообразено ги нарекува вредности и цивилизација. Затоа и не сме имале контакт со вонземјани. Оние што тука поминале, сигурно само фрлиле поглед и рекле, батали, овде нема смисла да застануваме!
А ти демек знаеш дека тука поминале и нè одминале вонземјани?
Знам! На еден елиен случајно налетав. Беше дојден накратко да ги праша нешто делфините на Даглас Адамс. Случајно се треснав во него додека пијан се тетеравев на плажата. Панично почнав да си го барам мобилниот телефон мислејќи дека ми паднал во морето, бидејќи… го знаете она… во него ми се сите битни информации, броеви, фотографии, рилсови, пасворди и слични оправдувања за да ѝ робувам на алатката. Елиенов ме изгледа од празна глава до петици, кои тешко се држат за гравитација, и пред да одлета ми довикна: „Ебате глупите! Џабе ви го праќавме Никола Тесла. Тоа што ви го даде, го доведовте до мобилен телефон со кој сонувате да го снимите вашиот непријател во компромитирачка положба(???), која вие ја нарекувате секс, за истата таа да ја споделите со цел да му уништите репутација и кариера и секако, бесконечно долго и со многумина, да го озборувате. Затоа Тесла на крајот почна да разговара со гулабите.
А ти, па, Русјаков, многу паметен! Иако, во право си, на некои кретени треба да им се забрани пристап до социјалните мрежи. Најглупи се оние што си вообразуваат дека се паметни, па упорно, ама без основа, од високо гледаат кон нас природно глупите, кои од животно искуство сме сфатиле дека нема многу причини да се умислуваме за битни и исклучиви. А социјалните мрежи се само практична метафора што ја злоупотребувам. Инаку е факинг алатка. Не можеш некому да му забраниш да користи машина за перење, не е тоа суштината.
Туку што е суштината?
Машината за перење мозоци. Може да ја сретнеме во реченици од типот, „преку тоа и тоа се обидуваат да ни го исперат мозокот“. Значи одредена моќ презема конкретни дејства за да спроведе акција преку која некому или на многумина ќе им биде „испран“ мозокот и така ќе создаде послушници, следбеници, обожаватели, корисни идиоти и робови. Океј, ама како изгледа тоа во суштина? Па, не доаѓа некој да ти ја отшрафи главата, да ти го украде мозокот што ќе го наполни со не знам каква манипулација и потоа да ти го врати назад обработен. А во меѓувреме, што правиш ти додека се одвива оваа чудна операција? Сносиш ли некаква одговорност? Каде си ти во целава приказна? Бленеш во телевизорот, интернетот, мрежата? Ја ѕиркаш комшиката? Сакаш да ја снимиш во компромитирачка положба(???) и потоа да ја споделуваш со другарчињата? Се шлепаш од Курто до Мурто и во обратна насока, во зависност од позицијата на задникот во фотелјата? Или ги мразиш Курто и Мурто зашто никој не обрнува внимание на твојата генијалност што не ја поседуваш. Или седиш пред гранап, зјапаш во убавицата која само што завршила со пазарење, па им објаснуваш на присутните што сè би ѝ направил бидејќи си умислуваш дека меѓу нозе носиш сексуална револуција, иако, за да бидеш стварно корисен, само треба да ѝ помогнеш со торбите, оти нели гледаш колку се натоварила, како да доаѓа крајот на светот пред почеток на омилената серија по која планираше да сподели инфлуенсерска мудрост како убавината ќе го спаси светот цитирајќи некој идиот што и самата го послуша, па сега ја има во долна облека по билбордите, нејзината разголена убавина рекламира квалитетни машини за перење и така ќе ги спаси светот и човештвото на кое секогаш некој сака да му го испере мозокот со неквалитетна манипулација. Ма, батали!
А ти, Русјаков, каде си ти во целата приказна?
Ја барам онаа плажа на која налетав на вонземјаниот, со надеж дека можеби повторно ќе се врати и ќе ме сожали, вака глуп и со намќорски дожд во душата, па ќе ме поведе со себе, ама бев многу пијан тогаш и не можам да се сетам на кое место точно сонував дека се наоѓа. Ај, батали!
