Кинеска поговорка вели дека „пријатели се оние што размислуваат слично“, додека Србите велат дека „пријателите се најголемото богатство во животот“. Кинеско-српската долгорочна пријателска размена и заемно корисната соработка меѓу двете страни целосно укажуваат дека континуираното продлабочување и развојот на односите меѓу двете земји се во согласност со историскиот тренд и фундаменталните интереси на народот, придонесувајќи за заеднички напредок на двете страни
АВТОРСКИ ТЕКСТ НА ПРЕТСЕДАТЕЛОТ НА НАРОДНА РЕПУБЛИКА КИНА, СИ ЏИНПИНГ, ЗА „ПОЛИТИКА“
Во продолжение го пренесуваме авторскиот текст на претседателот на НР Кина, Си Џинпинг, напишан непосредно пред неговата официјална посета на Србија. Фактот што во нашето соседство дојде светски лидер од највисок формат, чија моќ во полн капацитет се става во насока на остварување на принципите за просперитет и дава импулс за економски раст и благосостојба, за политичка и безбедносна стабилност, за регионална соработка на повеќе полиња и меѓусебно уважување и покажува респект во согласност со историските вистини и фундаменталните интереси на народите…, значи дека во еден контекст на конституирањето на македонските институции по изборите и востановувањето на најавените политики од страна на носителите на тие реформи треба да се имаат предвид огромниот потенцијал на конструктивните настани во нашето непосредно соседство и „поволните ветрови што треба да ги фатат македонските едра“. Без разлика на стратегиските ориентации по кои недвосмислено се движи Македонија, токму водењето отворени и неисклучиви политики и воспоставувањето отворени канали на комуникација со сите оние што ни ги уважуваат и безрезервно ги поддржуваат универзалните вредности, меѓународното право и правдата и ги уважуваат националните интереси на државите во регионот, вклучувајќи ги и нашите македонски (искажани референдумски на последните парламентарни и претседателски избори)…, треба да ни бидат институционален фокус и приоритет, токму заради развојот на нашата нација и држава. Во тој контекст, авторската колумна на претседателот на Кина, Си Џинпинг, иако пишувана и посветена на односите на Кина со нашиот сосед Србија, дава пример за соработка меѓу државите и народите, праќа една силна порака за подадена рака! Недвосмислено, тоа може да се однесува и на Македонија. Претседателот на Кина во своето писание открива широка палета можности за директна непосредна соработка и мисија за заеднички напредок за остварување на стремежите и визиите на државата и нацијата, кои исто така „го гледаат светот како поле за развој на народите“…
Кога што се приближува летото, сите растенија цветаат. Во овие времиња полни со надеж, по покана на претседателот Александар Вучиќ, ќе престојувам во државна посета на Република Србија. Ова ќе биде моја втора посета на вашата земја, земјата на убавините и легендите, како претседател на Народна Република Кина. Пријателските сцени при мојата последна посета на Србија пред осум години сѐ уште ми се живи во умот, а во изминатите осум години блиската соработка меѓу двете страни веќе постигна плодни резултати. Со нетрпение очекувам да се сретнам со претседателот Вучиќ и со другите српски лидери и пријатели за да разговараме за нашето пријателство заедно, да планираме соработка и да внесеме нова виталност во челичното пријателство меѓу Кина и Србија.
Отсекогаш постоел афинитет меѓу народот на Кина и Србија и покрај големата дистанца меѓу нас. За време на жестоката антифашистичка војна и во периодот на сопственото градење на државата во минатиот век, народите на двете земји стекнаа силно пријателство што опфаќа време и простор. Во екот на тековната трансформација на светот, невидена во еден век, меѓусебната поддршка на двете страни е посилна, заемно корисната соработка е поблиска, додека нашите размени и меѓусебно учење се позначајни. Без разлика на промените во меѓународната ситуација, Кина и Србија остануваат вистински пријатели и добри партнери. Нашето челично пријателство континуирано се зајакнува, давајќи пример за соработка меѓу државите и народите.
Нашите две земји секогаш меѓусебно се почитувале и си верувале. Претседателот Вучиќ и јас развивме добри работни односи преку нашите средби, телефонските разговори и размената на писма. Двете земји одржуваат тесна соработка на сите нивоа и на сите полиња. Двете страни целосно го разбираат и почитуваат изборот на сопствениот народ за развојниот пат, се залагаат за принципот на правда и правичност, цврсто ги поддржуваат суштинските интереси на едни со други од најголемо значење за нас. Одржавме тесна и непречена координација и соработка во билатералните и мултилатералните области. Сеопфатното стратегиско партнерство на двете земји континуирано се продлабочува со опипливи резултати.
Нашите две земји остануваат посветени на заемна придобивка. Србија е првиот партнер за слободна трговија на Кина во Централна и Источна Европа. Минатата година Кина беше најголемиот извор на странски инвестиции и втор најголем трговски партнер на Србија. Динамичната соработка на двете страни на полето на економијата и трговијата, индустриските синџири и изградбата на инфраструктура дава голем поттик во процесот на модернизација на двете земји. Железарницата „Смедерево ХБИС“, која ја посетив во 2016 година, веќе е една од трите најголеми извозници во Србија. Српските земјоделски и прехранбени производи, како мед, црвено вино, говедско и јагнешко месо, многу се популарни кај кинеските потрошувачи.
Нашите две земји секогаш си помагале. По избивањето на пандемијата на ковид-19 имав два телефонски разговора со претседателот Вучиќ и постигнавме важни консензуси за соработка во борбата против пандемијата. Кинеската страна дала помош и приоритетно обезбедила неколку контингенти заштитна и медицинска опрема, а во Србија испратила и медицински експерти. Српската страна ѝ даде целосна поддршка на кинеската страна во спроведувањето на програмата „Пролетен микроб“, со цел да се вакцинираат кинеските граѓани што живеат и работат во Србија. Невладините организации во Србија спонтано донираа маски и други ресурси за кинеските граѓани. Нашата заемна поддршка во моментите на предизвик е сведоштво за нашето бесценето братско пријателство.
Нашите две земји секогаш учеле една од друга. Кина и Србија се залагаат за среќата на народот и просперитетот на земјата, активно разменуваат искуства за управувањето со државата и ја зајакнуваат соработката на политичките партии. Двата народа имаат многу пријателски чувства еден кон друг, за што сведочат динамичните културни, спортски, туристички и меѓусебни размени. Српската кошаркарска ѕвезда Никола Јокиќ ги поддржа кошаркарите што играат на рурални кошаркарски натпревари. Договорот за укинување на визите за имателите на обични пасоши, склучен меѓу нашите две земји, ја олесни размената меѓу луѓето и билатералната соработка.
Кинеска поговорка вели дека „пријатели се оние што размислуваат слично“, додека Србите велат дека „пријателите се најголемото богатство во животот“. Кинеско-српската долгорочна пријателска размена и заемно корисната соработка меѓу двете страни целосно укажуваат дека континуираното продлабочување и развојот на односите меѓу двете земји се во согласност со историскиот тренд и фундаменталните интереси на народот, придонесувајќи за заеднички напредок на двете страни. На нов пат и во нова ера, натамошниот развој на сеопфатното стратегиско партнерство Кина – Србија ужива голем потенцијал. Подготвен сум преку оваа посета и заедно со српската страна да вложам вистински напори посветено да го промовираме кинеско-српското челично пријателство, да придонесам за подобрување на двата народа, да ги промовирам светскиот мир и развој, како и заеднички да ја промовираме изградбата на општество со заедничка иднина за човештвото.
Треба постојано да бидеме добри пријатели што искрено се однесуваат еден со друг. Кина и Србија дополнително ќе го продлабочат и прошират сеопфатното стратегиско партнерство. Двете страни континуирано ќе се движат по патот на меѓусебното разбирање, довербата, поддршката и помошта и ќе продолжат цврсто да се поддржуваат меѓусебно во важни прашања од витален интерес и исклучително значење. Кина го почитува и поддржува изборот на народот на Србија за развојниот пат, ги поддржува напорите на Србија за зачувување на националниот суверенитет и територијалниот интегритет, спротивставувајќи се на мешање на која било сила во внатрешните работи на Србија.
Треба постојано да бидеме добри партнери во соработката и заедничката победа. Кина се стреми да ја унапреди модернизацијата во сите аспекти преку висококвалитетен развој, како и брзо да развие нови квалитетни производствени сили. Во последните години Србија забележа извонредни достигнувања во економскиот и социјалниот развој. Кина и Србија треба целосно да го искористат потенцијалот на заемно корисна соработка, да го спроведат среднорочниот акциски план за заедничка изградба на „Појас и пат“, да се стремат да реализираат повеќе симболични проекти, да ја прошират соработката во областите што се појавуваат, како што се научна и технолошка иновација, напредно производство, зелена енергија, дигитална економија, вештачка интелигенција итн., за да ги споделиме заедно можностите за развој и да создадеме светла иднина.
Треба постојано да играме примерна улога во промовирањето на правдата и правичноста. Како челични пријатели и чувари на светскиот мир, Кина и Србија имаат слични позиции за многу важни меѓународни и регионални прашања. Соочувајќи се со меѓународната ситуација испреплетена со промени и турбуленции, треба постојано да ја зајакнуваме координацијата во меѓународните организации како што се Обединетите нации и други, да застанеме заедно за еднаков и уреден мултиполарен свет и универзално корисна и инклузивна економска глобализација, заедно да практикуваме вистински мултилатерализам, како и да се посветиме на зачувување на светскиот мир и стабилност и меѓународната правда и правичност.
Треба постојано да ја зајакнуваме врската во срцата на луѓето. Кинеско-српското челично пријателство е проткаено со крв и оган, па блеска посилно во новата ера. Континуирано треба да создаваме тродимензионална и разновидна шема на меѓучовечка размена и локална соработка, добро да ги користиме ефектите од „безвизниот режим плус директни летови“ и улогата на заемно воспоставување културни центри, да ја зајакнеме соработката на полињата на образованието, спортот, културата, туризмот итн., како и да се создадат повеќе можности за младите, со цел да го пренесуваат кинеско-српското пријателство од генерација на генерација.
Пред 25 години, НАТО флагрантно ја бомбардираше кинеската амбасада во Сојузна Република Југославија, при што беа убиени тројца кинески новинари, односно Шао Јунхуан, Ксу Сингху и неговата сопруга Жу Јинг. Ова никогаш не смееме да го заборавиме. Кинескиот народ го цени мирот, но никогаш нема да дозволи да се повтори историска трагедија. Пријателството меѓу Кина и Србија, кое е натопено во заедничката крв на двата народа, стана заедничко сеќавање на двата народа и ќе ги охрабри двете страни заедно да направат големи чекори напред.
Додека се навраќаме на патувањето што го поминаа нашите две земји заедно, сè уште се радуваме на ветувачката иднина кон која се стремиме заедно. Застанувајќи на нова историска почетна точка, ние сме подготвени да изградиме заедница на Кина и Србија со заедничка иднина во нова ера заедно со нашите српски пријатели. Пролетните цвеќиња еден ден ќе се претворат во есенски плодови, а дрвото на кинеско-српското пријателство ќе стане високо и силно и ќе донесе поплодни резултати, кои ќе придонесуваат за подобрување на двата народа. Ова е она што го очекуваме заедно и на што сакаме да бидеме сведоци.
Си Џинпинг, претседател наНР Кина
