Повеќето сценарија за катастрофи започнуваат исто: машините ќе го надминат човечкиот капацитет, ќе ја избегнат човечката контрола и ќе одбијат да бидат исклучени
Мислења на експерти во врска со вештачката интелигенција (ВИ):
Предупредувањата доаѓаат: вештачката интелигенција претставува егзистенцијален ризик за човештвото и мора да се заузди пред да биде предоцна. Но, кои се тие сценарија за катастрофи и како машините би можеле да го избришат човештвото?
Повеќето сценарија за катастрофи започнуваат исто: машините ќе го надминат човечкиот капацитет, ќе ја избегнат човечката контрола и ќе одбијат да бидат исклучени.
– Штом ќе добиеме машини чија цел е самоодржување, ние ќе бидеме во неволја – вели еден од најпризнаените светски стручњаци за вештачка интелигенција Јошуа Бенџо, канадски научник, најпознат по неговата работа на вештачки невронски мрежи и длабоко учење.
Бидејќи такви машини сè уште не постојат, замислувањето како би можеле тие да го загрозат човештвото често им се остава на филозофијата и научната фантастика.
Филозофот Ник Бостром напишал за „експлозија на интелигенцијата“, за која вели дека ќе се случи кога суперинтелигентните машини ќе почнат да дизајнираат свои машини. Тој ја илустрирал оваа идеја со приказната за суперинтелигентна вештачка интелигенција во фабрика за спојници за хартија.
Вештачката интелигенција добила задача да го максимизира производството на клипови и на тој начин „да ја претвори прво Земјата, а потоа и сите поголеми делови од видливиот универзум во спојници“.
Многумина ги отфрлија идеите на Бостром како научна фантастика, бидејќи тој одделно тврдеше дека човештвото е компјутерска симулација и поддржува теории блиски до евгениката. Сепак, неговите размислувања за вештачката интелигенција беа исклучително влијателни, инспирирајќи ги и Илон Маск и професорот Стивен Хокинг.
Ако суперинтелигентните машини сакаат да го уништат човештвото, дефинитивно им треба физичка форма. Црвеноокиот киборг на Арнолд Шварценегер, испратен од иднината да му стави крај на човечкиот отпор користејќи вештачка интелигенција во филмот „Терминатор“, се покажа како интересна слика, особено за медиумите.
Но експертите ја отфрлија идејата.
– Овој концепт на научна фантастика веројатно нема да стане реалност во следните децении, ако воопшто некогаш стане – напиша групата „Стоп килер роботс“ во извештајот за 2021 година.
Сепак, групата предупреди дека давањето моќ на машините да донесуваат одлуки за живот и смрт е егзистенцијален ризик.
Експертката за роботи Керстин Даутенхан од Универзитетот во Ватерло во Канада ги отфрли тие стравови. Таа изјави за АФП дека вештачката интелигенција веројатно нема да им даде на машините поголеми мисловни способности или да ги впие со желба да ги убијат сите луѓе. Роботите не се злобни, вели таа, иако признава дека програмерите можат да ги натераат да прават лоши работи. Р.С.
