Лекарската комора реагираше за случајот со Клиниката за онкологија во кој скопското основно јавно обвинителствo и Министерството за внатрешни работи продолжуваат да преземаат дејствија во предистражна постапка.
– Лекарската комора на Македонија изразува голема загриженост во однос на вознемирувачките информации изнесени во медиумите за наводни злоупотреби со цитостатици на Клиниката за онкологија и радиотерапија, што доколку се покажат како вистинити ќе значат голема повреда на правата на пациентите, но и непочитување на основните етички принципи во вршење на здравствената дејност, што треба да бидат приоритет во работата на секој лекар и секој здравствен работник воопшто – категорични се од Лекарската комора.
Се наведува и дека терапијата за пациентите не смее да биде злоупотребена за лична корист.
– Ниту еден пациент во нашата земја, особено онколошки пациенти кои се наоѓаат во животно-загрозувачка состојба не смеат во ниту еден момент да бидат доведени во ситуација да не им биде достапна во целост терапијата која се обезбедува од пари од буџетот на Фондот за здравствено осигурување или од Министерството за здравство, а уште помалку таа терапија да биде злоупотребена за лична корист на поединци – се вели во соопштението од Лекарската комора.
Оттаму очекуваат расчистување на сомнежите за случајот.
– Лекарската комора дава поддршка на јавно-обвинителскиот систем и органите на истрагата кои очекуваме час поскоро да ги расчистат поставените сомневања и да споделат со јавноста точни информации за тоа што точно се случувало на оваа клиника, која е единствена здравствена установа од ваков тип во нашата земја и каде се лекуваат најголем број од пациентите кои имаат малигни заболувања. Исто така, цврсто сме убедени дека на Клиниката за онкологија и радиотерапија има чесни здравствени работници кои совесно, одговорно и професионално ги лекуваат пациентите и овие успешни приказни исто така треба да добијат простор во јавноста, поради што и истакнуваме дека не треба да се даваат колективни осуди, туку точно треба да бидат посочени и санкционирани виновниците врз основа на релеватни докази – се додава во соопштението до јавноста.
Лекарската комора будно ќе ги следи сите случувања и навремено соодвено ќе реагира во рамките на своите надлежности доколку се докаже дека одредени лекари од оваа клиника сториле злоупотреби со кои ги повредиле етичките принципи и кодексот на медицинската деонтологија или нанеле директна штета на пациенти во процесот на лекување, заклучуваат од Лекарската комора.
Во текот на вчерашниот ден, врз основа на судска наредба, по насоки на јавен обвинител од Основното јавно обвинителство Скопје, припадници на МВР извршија претреси на Клиниката за онкологија, како и на уште две локации во приватни станови во Скопје. Притоа се одземени компјутери, компјутерски податоци и друга документација, кои ќе бидат предмет на анализа и вештачење.
