Администрацијата за храна и лекови на САД (ФДА) одобри итна употреба на вакцината на „Фајзер“ против коронавирус за деца на возраст од 12 години, проширувајќи ја програмата за вакцинација во САД, каде стапката на вакцинација опаднала.
ФДА објави дека одлуката за намалување на старосната граница вклучува милиони деца на возраст од 12 до 15 години во програмата за вакцинација.
Вакцината „Фајзер“ е првата вакцина одобрена во САД за итна употреба за оваа возрасна група, што се смета за важен чекор кон безбедно враќање на децата на училиште. Американскиот претседател Џо Бајден побара од сојузните држави веднаш да обезбедат вакцини за младите.
– Денешната одлука овозможува заштита на помладата популација од инфекција со коронавирус, приближувајќи се кон враќање на нормалноста и крајот на пандемијата – рече вршителот на должноста претседател на ФДА, Џенет Вудкок.
– Родителите и старателите на децата можат да бидат сигурни дека агенцијата спроведе ригорозна и детална проверка на сите достапни податоци, како што тоа го сторивме во случаи на други одобренија за итна употреба на вакцината против ковид-19 – рече таа.
Повеќето деца кои се инфицираат со коронавирус развиваат благи симптоми или воопшто немаат. Сепак, децата не се целосно изложени на ризик да се разболат сериозно, но можат да ја рашират инфекцијата.
