Една фотографија од одмор во Јужен Тирол предизвика политички скандал во Германија поради непочитување на мерките за коронавирус.
Германскиот претседател Франк-Валтер Штајнмаер позирал без маска и неопходно растојание со членови на народен оркестар.
Критичарите го обвинуваат Штајнмаер за примена на двојни стандарди кога станува збор за почитување на правилата за коронавирусот, бидејќи тие не важат за него, додека ги повикува граѓаните да ги почитуваат.
На фотографијата е прикажан и претседателот на италијанската покраина Јужен Тирол, Арно Компачер.
Кабинетот на Штајнмаер рече дека претседателот внимава на правилата за растојание и хигиена дури и кога е на одмор, но очигледно тоа не може секогаш да се применува оптимално.
– Многу е важно секој ден да сме свесни дека мора да бидеме внимателни – се додава во пораката на кабинетот.
