Вакцината за ковид-19 на универзитетот Оксфорд би ги заштитила луѓето барем неколку години, се надеваат научниците
Научниците од универзитетот Оксфорд, кои водат битка за што побрзо да откријат вакцина за ковид-19, веруваат дека кога ќе ја произведат, таа би можела да им овозможи на луѓето заштита барем неколку години, пренесува „Њузвик“.
Професорката Сара Гилберт, која го води истражувањето на Универзитетот во Оксфорд, се надева дека вакцината ќе обезбеди „добро времетраење на имунитетот“ од новиот коронавирус.
Вакцината, која се развива во партнерство со фармацевтската компанија „АстраЗенека“, е опишана како „водечки кандидат“ од главниот научник на Светската здравствена организација(СЗО), Сумја Сваминатан.
Научниците стравуваа дека секоја потенцијална вакцина, која не се очекува да биде достапна за пошироката јавност барем до наредната година, нема да може да понуди долгорочна заштита, со оглед дека вакцините за другите видови на коронавируси, како што е обичната настинка, мора да се примаат на една година.
– Вакцините имаат различен начин на предизвикување реакција со имунолошкиот систем. Ние будно ги следиме реакциите кај луѓето во нашите студии и користиме ист тип на технологија за да ги направиме вакцините да имаат подолго дејство, односно барем неколку години. Врз основа на претходните студии, ние сме оптимистични дека ќе видиме добро времетраење на имунитетот, и веројатно тој ќе биде и подобар од имунитетот стекнат по природен пат- вели Гилберт.
Научниците предупредуваат на тешка и напорна зима доколку вакцината не биде развиена дотогаш, а годинава сезоната на грип е исто така тешка.
– Целата оваа епидемија се потпира премногу на претпоставки што се покажаа како невистинити. Мој совет би бил да се подготвиме за најлошото – вели Сер Џон Бел, професор по медицина на универзитетот Оксфорд.
Тој смета дека владата на Велика Британија не треба да се надева дека вакцината ќе биде подготвена до почетокот на зимата.
– Се надевам дека можеме да се подобриме и во тие временски рамки да дојдеме до вашите очекувања за спас – им рече Гилберт на британските пратеници.
