Британските истражувачи се обидуваат преку проучување на гените на заболените од ковид-19 да ја решат загатката која го мачи светот – зошто некои луѓе умираат од вирусот, додека други поминуваат само со слаба главоболка, пренесува „Еуроактив“.
Истражувачи ќе го следат генетскиот код на луѓе кои заболеле и имаат сериозна клиничка слика предизвикана од новиот коронавирус, и ќе ги споредат нивните геноми со оние кои поминале со лесна клиничка слика или воопшто немале симптоми.
Во потрагата по специфичните геноми ќе бидат вклучени над 20.000 луѓе кои биле на интензивна нега поради коронавирусот, како и 15.000 луѓе кои имале слаби симптоми. Научниците се прашуваат како за некои вирусот е кобен, додека за други заразени е како обична настинка.
– Се надеваме дека преку геномот ќе разбереме како оваа болест ги убива луѓето – изјави за „Ројтерс“ Кенет Бејли, кој ја води студијата на универзитетот во Единбург.
Тој објаснува дека споредбата на човековите геноми ќе оди постојано и бавно, поради тоа што има меѓу четири и пет милиони различни геноми меѓу две лица.
– Преку читање на геномот, би можеле да ја идентификуваме варијацијата што влијае на реакцијата на ковид-19 и така да откриеме нови терапии што можат да ги намалат штетите, за да ја спречат смртта кај заразените, па дури и да влијаат во сузбивање на идните пандемии – изјави Марк Колфилд, директорот на „Геномикс Ингланд“.
Дел од одговорите можат да бидат достапни за неколку недели, иако според Бејли, кога ќе пристигнат повеќе резултати, полесно ќе се докаже дека податоците се веродостојни. Резултатите ќе бидат споделени на глобално ниво.
– Шансата да умрете од инфекцијата на вирусот е силно впишана во вашите гени. А постои поголема шанса за тоа одошто да настрадате од срцеви заболувања, или пак, карцином – вели Бејли.
