Италија најверојатно ќе ја продолжи вонредната состојба за да ја одржи кризата со коронавирусот под контрола додека владата се обидува да избегне зголемување на бројот на новозаболени како што е случајот во повеќето европски земји, рече официјален висок италијански претставник.
Вонредната состојба, која ќе истече во средината на октомври, овозможува поголеми овластувања и за регионалните власти и за централната влада, што им олеснува на службените лица да ја заобиколат бирократијата што го гуши процесот на донесување одлуки во Италија.
– Верувам дека владата ќе треба да побара дополнително продолжување – рече заменик-министерот за здравство Сандра Зампа за државната телевизија РАИ.
Италија беше првата земја во Европа погодена од ковид-19 и има најголем број смртни случаи на континентот – 35.851.
Благодарение на еден од најстрогите карантини во светот, Италија успеа да ја стави пандемијата под контрола до летото. Сепак, случаите се зголемија во текот на минатиот месец и во последните седум дена во просек се пријавени по 1.694 нови случаи дневно.
