Во Русија е произведена првата серија од вакцината „спутник 5“ за цивилна употреба, а се очекува наскоро да следи и дистрибуцијата низ сите региони во земјата.
Како што соопшти руското Министерство за здравство, вакцината „спутник 5“ е изработена од Институтот за епидемиологија и микробиологија „Гамалеја“ и ги минала тестовите во лабораториите на Федералната здравствена служба.
Рускиот министер за здравство Михаил Мураско претходно објасни дека производството на вакцината за цивилна употреба во оваа фаза значи дека ќе бидат вакцинирани граѓаните од ризичните групи, првенствено лекарите и наставниците, а вакцинацијата ќе се изврши истовремено со последната фаза од клиничките испитувања.
На 11 август Русија стана првата земја во светот што регистрира вакцина против коронавирусот. „Спутник 5“ во јуни и јули мина низ две фази од клиничките испитувања, а последната, трета фаза ќе се спроведе по регистрацијата на вакцината.
