Неодамнешните истражувања покажаа дека вакцината на „Фајзер“ против коронавирусот е 90,7 проценти ефикасна во спречувањето симптоматски инфекции кај деца на возраст од 5 до 11 години.
За време на тестирањето, 16 деца што примиле плацебо биле заразени од Ковид-19 во споредба со три деца што биле вакцинирани, изјавија од „Фајзер“ при доставувањето на документацијата до американската Администрација за храна и лекови (ФДА).
Клиничките испитувања на деца на возраст од пет до 11 години не се дизајнирани првенствено за да ја измерат ефикасноста против Ковид-19, туку да направат споредба на количината неутрализирачки антитела кај вакцинираните деца со оние кај возрасните.
Врз основа на овие резултати, од „Фајзер“ и „Бионтек“ минатиот месец изјавија дека нивната вакцина создала силен одговор кај децата.
