Вакцината на компанијата „Модерна“ е многу слична со онаа на „Фајзер“/„Биоентек“ која е одобрена во Велика Британија, САД, Канада и некои други земји, а наскоро се очекува да добие зелено светло и во Европската унија.
Сепак, постојат неколку клучни разлики. Една од најважните е што вакцината на „Модерна“ може да се чува во конвенционални ладилници, што ја олеснува дистрибуцијата до помалите медицински центри и локалните заедници.
За разлика од „Фајзер“, која е позната фармацевтска компанија, „Модерна“ е биотехнолошка компанија со седиште во Кембриџ, Масачусетс, пишува Си-ен-ен.
„Модерна“ е основана во 2010 година и досега нема пласирано ниту еден производ на пазарот, ниту има добиено одобрение од амариканската Агенција за храна и лекови (ФДА) за која било од нејзините девет вакцини. Исто така, ова е прв пат некој од нејзините производи да ја помине третата фаза од клиничките испитувања.
Како што пренесуваат американските медиуми, брзиот развој на вакцината против ковид-19 од страна на истражувачите на „Модерна“, се должи на тоа што тие имале голема предност во искуството со овој вид на вирус.
Имено, тие претходно соработувале со експерти од Националниот институт за здравство за вакцина против друг вид на коронавирус, МЕРС. Кога кинеските научници го објавија геномот на ковид-19 во средината на јануари, вработените во „Модерна“ веднаш започнале со работа.
„Модерна“, за време на клиничките испитувања, на 15.000 учесници им дала плацебо, физиолошки раствор кој нема ефект. За неколку месеци, 185 учесници се заразиле со ковид-19, а кај 30 се развила потешка форма на болеста. Еден од нив починал.
15.000 други испитаници примиле вакцина, а само 11 од нив се заразиле со коронавирус, при што никој од заразените не развил потешки симптоми на болеста.
Вакцината била ефикасна кај сите возрасни групи, полови, расни и етнички групи и кај учесници со хронични заболувања кои биле изложени на ризик за развој на потешки симптоми на ковид-19.
Вакцината „Фајзер“/„Биоентек“ исто така имаше ефикасност близу 95 отсто.
Вакцината на „Модерна“, како и онаа на „Фајзер“, изопрачува РНК или мРНК, генетски рецепт за создавање на делот од телата лоцирани на врвот на коронавирусот. Кога РНК се инјектира во организмот, нашиот имунолошки систем прави антитела кон површината односно „шилците“ на коронавирусот што треба да нè штитат дури и кога подоцна сме изложени на овој вирус.
Во суштина, и двете вакцини се потпираат на мРНК за да го спречат вирусот, само што имаат малку поинаков состав.
