За првпат по девет недели Италијанците денес можат да одат и да ги посетуваат роднините откако најпогодената земја на пандемијата на коронавирус во Европа почна да ги олеснува рестриктивните мерки.
Четири милиони луѓе, од кои 72 проценти се мажи, ќе се вратат на градилиштата и фабриките за да се рестартираат економските активности.
Рестораните кои ја преживеаја најтешката криза од неколку генерации, ќе бидат отворени само за нарачка на храна надвор, но баровите, па дури и продавниците за сладолед ќе останат затворени.
Јавниот превоз не се препорачува и сите ќе треба да носат маски на јавни места.
Италија беше првата западна демократија што целосно се затвори како резултат на болеста Ковид-19. Официјално, 28.884 луѓе починале во Италија како резултат на епидемијата.
Исто така, последиците за економијата достигнаа историски размери. Третата најголема економија на еврозоната се очекува да доживее најголем пад од Големата криза од 30-тите години на 20 век.
Половина од работната сила добива грантови од владата, а ист број стравуваат од невработеност. Исто така, дел од невработените не веруваат во способноста на премиерот Џузепе Конте безбедно да ја избави земјата од опасност.
„Загрижен сум за повторното отворање. Властите не знаат како да постапат“, рече 37-годишниот Давид Наполеони.
Поради главно децентрализираниот систем, повторното отворање е нерамномерно и провинциите Венето и Калабрија дозволија послужување храна и пијалаци во баровите и рестораните минатата недела, а областа Џенова размислува да ги отвори плажите и рекреативните активности како што се едрење, но во помали групи.
Меѓутоа, соседниот регион Емилија-Ромања сè уште ги држи затворени плажите, дури и за оние кои живеат покрај морето.
Дури 62 проценти од Италијанците веруваат дека ќе им треба психолошка помош поради мерките за карантинот.
Поддршката за владата на Конте останува на 63 проценти, но опадна за осум проценти од март.
