Цените на основните прехранбени производи нема да се менуваат, поточно ќе бидат онолку колку што биле на 1 декември, се до 31 јануари. Оваа владина одлука важи за лебот, шеќерот, брашното – тип 400, сончогледово масло за јадење, трајното млеко со масленост од 2,8, 3,2 и 3,5 проценти, свежото месо и сувомесни производи, сирењето и урдата, за во трговијата на големо и во трговијата на мало.
Одлуката за определување највисоки цени на основни прехранбени производи што вчера ја донесе Владата, може да биде продолжена и по 31 јануари 2021 ако тоа и натаму го бара состојбата на пазарот.
Замрзнувањето на цените во петокот го најави министерот за економија Крешник Бектеши. Мерката е базирана на анализата и пресметките што ги направило Секторот за трговија при Министерството за економија. Бектеши најави дека ако предвидат оти ќе има ценовни шокови ќе се интервенира во рамки на надлежностите и согласно Законот за трговија.
Со барање за замрзнување на цените на основните прехранбени производи претходно излезе Организацијата на потрошувачи на Македонија.
Лидерот на ВМРО-ДПМНЕ Христијан Мицкоски, смета дека замрзнувањето на цените на основните прехранбени продукти од страна на Владата, можеби ќе го ублажи, но никако не може да го стопира бранот на зголемена инфлација и намален стандард на граѓаните. Според него, причинител за инфлаторната спирала е енергетската криза, за чие надминување власта спроведува погрешни политики.
-Тоа не се прави со ограничување на цената на производите, туку тоа е една од сетот мерки што требаше да се преземат – вели Мицкоски.
Македонија не е прва земја во регионот што ги замрзна цените на основните прехранбени и стратешки производи. Во Србија од 1 декември во наредните 60 дена се замрзнати се ставени цените на шеќерот, брашното, сончогледовото масло, свинското месо и млекото. Претходно тоа го направи и Црна Гора, а Хрватска пред еден месец ги замрзна цените на горивата.
