Сојузот на стопански комори на Македонија потпиша меморандум за соработка со Стопанската комора на приморска Словенија, со цел унапредување на економската соработка меѓу двете држави, со акцент на секторите земјоделство, туризам, логистика и медицина.
– Во изминатите години успешни мултинационални компании основани во Копер, а со своја дејност регистрирани и во Македонија, активно работат во областите на транспорт, логистика и медицина. Успешната соработка со Стопанската комора на приморска Словенија денеска ја формализираме со договор – изјави претседателката на Сојузот на стопански комори, Данела Арсовска.
Како што се наведува во соопштението од комората, деловните субјекти од нашата држава имаа веќе развиена соработка со своите словенечки партнери, која има потенцијал да се прошири и продлабочи со интензивирање на коморската соработка.
– Во Словенија се работи многу на развој на еколошкиот туризам, исто така имаме и висококвалитетни земјоделски производи и маслиново масло. Простор за соработка гледаме и во секторот на автоматизација и дигитализација, а нашето искуство во преговорите со ЕУ исто така може да биде корисно со почнување на претпристапните преговори за членство на вашата земја – објасни Роберт Ракар, извршен директор на Стопанска комора на приморска Словенија.
Во рамките на посетата во Сојузот на стопански комори се одржа и состанок со заменик-министерот за земјоделство, шумарство и водостопанство, Трајан Димковски, кој ги презентираше можностите за инвестиции во земјоделството.
– Овој меморандум за соработка ќе биде спроведен на начин што ќе обезбеди, поттикнување, развивање и обезбедување на сите облици на соработка помеѓу Сојузот и Комората, како и зголемување на потенцијалите за промоција, поттикнување и развој на сите форми на соработка помеѓу делoвните заедници, поддршка за реализација на инвестициски проекти и заедничко планирање и организирање настани за соработка меѓу двете земји – се наведува во соопштението од Сојуз на стопански комори на Македонија.
