Шефот на француската држава во телевизиско интервју одговори на критиките и загриженоста на јавноста, по неговите контроверзни изјави за можно испраќање сојузнички трупи за поддршка на Украина, додавајќи нов политички зачин на првичната изјава, со своето предупредување дека „ако ѝ се дозволи на Украина да ја изгуби оваа војна, тогаш сигурно Русија ќе им се закани на Молдавија, Романија, Полска…“
Претседателот на Франција не се повлекува од својот воинствен восклик за активно сојузничко вклучување во руско-украинската војна
Емануел Макрон сака да ги подготви Французите за да се „отрезнат“ откако тој го повика за поголема поддршка на Киев, без да ја прецизира нејзината рамка. Ова е застрашувачката равенка што францускиот претседател се обиде да ја реши, вечерта на 14 март, на телевизиите ТФФ1 и Франс 2, со цел да го смири негодувањето што го предизвикаа во Франција и во странство со неговите контроверзни изјави за можно испраќање сојузнички трупи во Украина.
Макрон не се повлекува од изјавата, напротив, се обидува да разубеди и мобилизира
Сакајќи да ги убеди своите многубројни противници, Емануел Макрон инсистираше на „егзистенцијалната“ закана што овој конфликт ја претставува „за нашата Европа и за Франција“. Оваа војна, „на нашите врати“, рече тој, „е овој крај на негрижата за која зборував пред неколку години“.
– Ако ситуацијата се влоши, ние мора да бидеме подготвени и ќе бидеме подготвени – продолжи тој, без детали за неговите намери или не исклучувајќи ништо, дури ни распоредувањето француски војници на украинска територија.
– Има ескалација од страна на Русија и мора да кажеме дека сме подготвени да одговориме – инсистираше тој, едвај десет дена откако рече, на 26 февруари во Елисејската палата, дека „ништо не треба да се исклучи“.
– Поставивме премногу ограничувања во нашиот речник – нагласи тој, неколку часа пред да лета за Берлин за да се сретне со канцеларот Олаф Шолц, многу заинтересиран да избегне ескалација со Москва, откако неодамнешните изјави на францускиот претседател го налутија Берлин. Двајцата лидери треба да се обидат да ги решат нивните разлики за ова прашање за време на средбата лице в лице, пред да се сретнат со полскиот премиер Доналд Туск. Обид за заедничка тројна позиција, една недела пред следниот Европски совет, главно посветен на војната во Украина.
Ситуацијата во Украина е сериозна за Емануел Макрон, кој не се двоуми да го драматизира прашањето, додека руските трупи напредуваат во Донбас, по неуспехот на украинската контраофанзива започната во летото 2023 година.
– Ако војната би се проширила во Европа, ова би бил единствениот избор на Русија. Но да одлучиме денес дека нема да одговориме на тоа е веќе да го прифатиме поразот – предупреди тој за време на неговото телевизиско интервју. – Ако ѝ се дозволи на Украина да ја изгуби оваа војна, тогаш сигурно Русија ќе им се закани на Молдавија, Романија, Полска – предупреди тој.
Макрон: Ако Русија победи во оваа војна, кредибилитетот на Европа ќе се сведе на нула!
– Животите на Французите би се промениле. Не би имале повеќе безбедност во Европа. Таму е загрозена безбедноста на Французите – рече шефот на државата, мавтајќи со катастрофалните последици врз цената на пченицата, гасот и суверенитетот.
Доколку истрае, Емануел Макрон не дава никакви нови најави во врска со оружјето. Но тој ги повикува сојузниците да работат заедно за конечно да ја забрзаат испораката на муниција во Украина.
– Кога Русија ќе истрела десет гранати, тие одговараат со една – забележа тој.
Патем, Емануел Макрон му одговара на рускиот претседател, кој се заканува дека ќе употреби нуклеарен оган со цел да ги одврати западњаците да испратат засилување во Украина. Нагласувајќи ја оваа закана, „не е соодветно кога имаме нуклеарно оружје“, рече тој, не без да потсети дека и Франција има арсенал од овој тип: „Мораме да се чувствуваме особено заштитени затоа што и Франција располага со истата сила.“
Се разговара за предлози за „европски заеми за финансирање нови иницијативи“
За да се зајакне одбраната на континентот и на Украина, Емануел Макрон потврди дека го поддржува предлогот на премиерот на Естонија, Каја Калас, во корист на европски заем за финансирање „нови иницијативи“, врз основа на модел на оној што „ни овозможи да се одржиме“ за време на пандемијата на ковид-19. Но Олаф Шолц не сака да слушне за тоа до ден-денес.
– Не можеме во текот на овие две години да кажеме оваа војна е егзистенцијална, „ние сме загрозени со нашата иднина“ и да продолжиме да живееме како ништо да не се случило – се правда тој. Запрашан за тоа дека трите милијарди евра ветени од Франција за воена поддршка на Киев оваа година не се буџетирани, тој не ги прецизираше своите намери, само посочи дека законот за воено програмирање донесен минатата година овозможил двојно да се зголеми буџетот на армијата.
Обвинет, на националната сцена, за искористување на овој конфликт и драматизирање на прашањата за чисто изборни цели, Емануел Макрон се брани. – Не е сериозно – вели тој изнервиран. Истата дебата процвета, се сеќава тој, за време на претседателската кампања. Пристигнувањето на руските тенкови во Украина, кои брзаат кон Киев, на 24 февруари 2022 година, делумно ја поткопа кампањата и истовремено беше во негов корист, обезбедувајќи му победа. Но Макрон истакнува, „одговорноста за оваа војна, одговорноста за ударите дадени на украинскиот фронт е само на Русија“.
Три месеци пред европските избори, претседателскиот табор можеби опасно стои зад листата на Националниот собир (РН), но Макрон смирува. Стоејќи над партиите, Емануел Макрон никогаш не ги спомнува имињата на оние што не го поддржаа, во вторникот на 12 март и во средата на 13 март, за време на дебатите во парламентот, билатералниот безбедносен договор потпишан со украинскиот претседател Володимир Зеленски.
– Тоа е слобода, тоа е политички плурализам, јас го почитувам тоа – коментира тој, потврдувајќи дека „постојано се трудел да го одржи единството на земјата од самиот почеток“.
Претседателот внимава да не ги наведе Националниот собир (партијата на Ле Пен), која беше воздржана, или Бунтовна Франција и Комунистичката партија, која гласаше против. Но, тој ја користи формулата: „Изборот да се воздржите или да гласате против поддршката за Украина не е избор на мир, туку избор на пораз“. Следуваше линија спротивна на таа, од 26 февруари, од страна на претседателското мнозинство, кое брзо немилосрдно го нападна РН, опишана како „партија на Москва“.
Барајќи поза на височина, дистанцирана од конфронтацијата меѓу претседателското мнозинство и партијата на Џордан Бардела, Емануел Макрон ја присвојува споредбата со конференцијата во Минхен во 1938 година.
– Во Украина денес, за да се користи старата формула на Черчил, „мора да го имате нервот на мирот“ – вели тој, додека неговиот табор продолжува да ги споредува оние што ја доведуваат во прашање неговата стратегија со „Минхенците“, кои потпишаа со Хитлер во 1938 година.
Макрон се обидува жестоко да алармира
Трагедијата на историјата е една од алатките на располагање на Емануел Макрон за да го потврди својот статус на државник. Не е важно, сугерира тој, дека оваа наводна храброст го чини популарност.
– Сè уште е многу полесно да се оди и да им се раскажуваат приказни на луѓето. Би можел да ви кажам оваа вечер, бидејќи не е популарно, „знаете, далеку е, ние сме за мир“ – вели тој.
– Но војната е на европско тло – забележува тој, „има помалку од 1.500 километри меѓу Стразбур и Лавов.“
– Поддршка за Украина, да. Дување на жарот на потенцијален глобален конфликт за изборни цели, не! – возврати Ерик Чиоти, лидерот на Републиканците.
Тони Гламчевски, дописник на „Нова Македонија“ од Стразбур
